Salih Muslim: Tirkiye dixwaze hilbijartinên li Rojava bi êrişan sabote bike 

2024-06-01 10:56:24


	 

	NAVENDA NÛÇEYAN - Hevserokê PYD'ê Salih Muslim êrişên Tirkiyeyê weke hewldana sabotekirina hilbijartinan pênase kir û got: "Dewleta tirk li dijî hilbijartinan gelekî bêtehemil e. Lê belê Rêveberiya Xweser a Bakur û Rojhilatê Sûriyeyê wê teqez van hilbijartinan li dar bixe.’’

	 

	Piştî ku Rêveberiya Xweser a Demokratîk a Bakur û Rojhilatê Sûriyeyê ragihand ku li wê li herêmê hilbijartinên xwecihî pêk werin, gef û êrişên Tirkiyeyê yên li dijî herêmê zêdetir bûn û bênavber didomin. Di encama êrişên li ser herêmê ya 31’ê gulanê de 4 şervanên Hêzên Sûriyeya Demokratîk (HSD) canê xwe ji dest dan û 11 sivîl jî birîndar bûn ku di nava wan de jin û zarok jî hene.

	 

	Hevserokê Partiya Yekîtiya Demokratîk (PYD) Salih Muslim têkildarî êrişên Tirkiyeyê yên beriya hilbijartina xwecihî ku li ser herêmê berdewam dikin, ji Ajansa Nûçeyan a Firatê (ANF) re axivî.

	 

	‘HILBIJARTIN WÊ BI AWAYEKÎ ZELAL WERIN KIRIN’

	 

	Salih Muslim têkildarî hilbijartinên xwecihî yên li Bakur û Rojhilatê Sûriyeyê axivî û got: "Hilbijartin wê bi armanca zêdetirkirina xebatên ji gelê herêmê re werin kirin. Heya niha hin kêmasî hebûn. Wê bibe hilbijartineke demokratîk a ku gelên li herêmê beşdarî bibin. Tu eleqeya hilbijartinên ku wê werin kirin, bi tu kesî re tune ye û ne rast e bi awayekî din werin nirxandin. Li tevahiya Bakur û Rojhilatê Sûriyeyê cara ewil hilbijartineke bi vî rengî wê were kirin. Ji ber vê yekê jî hin acizî çêdibin. Hilbijartin wê bi awayekî demokratîk û zelal werin kirin. Her wiha pîvanên Peymana Civakî ya hatî derxistin, tên sepandin. Ji ber vê yekê mafê tu kesî tune ye ku têkildarî hilbijartinan tiştekî bibêje. Gelê me wê bi dilxweşî biçe ser sindoqan."

	 

	‘WÊ LI GORÎ ŞERTÊN BAKUR Û ROJHILATÊ SÛRIYEYÊ HILBIJARTIN WERIN LIDARXISTIN’

	 

	Salih Muslim bal kişand ser daxuyaniyên Berdevkê Wezareta Karên Derve yê DYA’yê û axaftina xwe wiha domand: "Di daxuyaniyê de tê destnîşankirin ku li Bakur û Rojhilatê Sûriyeyê li gorî biryara NY’yê ya 2254’an derfeteke bi vî rengî ava nebûye. Bi biryara 2254’an a NY’yê dixwazin balê bikişînin ser çareseriya siyasî. Wan çima daxuyaniyeke bi vî rengî da? Ji ber ku mijara hilbijartinên berbehs di rojeva dewleta tirk de ye û ji ber ku ew bûyerê bi rengekî din dinirxînin, daxuyaniyeke bi vî rengî hate dayîn. Dewleta tirk bi rojan e dibêje ku DYE li pişt hilbijartinan e. Dibe ku piştî bertekên dewleta Tirk daxuyaniyeke bi vî rengî hatibe dayîn. Gotineke dîplomatîk e û armanc jî sornekirina Tirkiyeyê ye. Wê li gorî şertên Bakur û Rojhilatê Sûriyeyê hilbijartin werin lidarxistin. Wê bêyî piştevanî û şêwirmendiya hin kesan werin lidarxistin." 

	 

	‘ASTA BÊTEHEMILIYA DEWLETA TIRK ZÊDE BÛ’

	 

	Salih Muslim bal kişand ser êrişên Tirkiyeyê yên piştî daxuyaniya Amerîkayê û wiha got: "Dewleta tirk ji destpêkê ve li dijî van hilbijartinan e. Dewleta tirk li dijî îradeya gel û demokrasiyê ye. Dema ku li herêmê pêngaveke têkildarî demokrasiyê tê avêtin, dewleta Tirk li dijî wê pêngavê derdikeve. Bi min tu eleqeya êrişên dewleta tirk bi daxuyaniya Amerîkayê re tune ye. Ev êriş bi salan e hene. Bi taybetî jî piştî Peymana Civakî asta bêtehemiliyê dewleta tirk zêde bû." 

	 

	‘GELÊ ME WÊ BI ÎRADEYA XWE NÛNERÊN XWE HILBIJÊRE’

	 

	Salih Muslim êrişên Tirkiyeyê yên li ser herêmê wek sabotekirina hilbijartinan, çavtirsandina gel û astengkirina çûna ser sindoqan nirxand û axaftina xwe wiha bi dawî kir: "Dewleta tirk ji bo ku hilbijartin neyên kirin wê her tiştî bike. Li dijî hilbijartinan li gel dewleta tirk bêtehemiliyeke mezin heye. Lê belê Rêveberiya Xweser a Demokratîk a Bakur û Rojhilatê Sûriyeyê wê teqez van hilbijartinan li dar bixe. Wê gelê me jî biçe ser sindoqan û wê bi îradeya xwe nûnerên xwe hilbijêre."