Gel li Colemêrg û Geverê ji bo pîrozbahiyan daket kolanan

2024-04-01 02:32:33


	 

	COLEMÊRG - DEM Partî li Colemêrg û Gevera hezaran leşker û polîs lê hatibûn veguhestin, şaredarî bi dest xistin. Pîrozbahiyên gel heta nîvê şevê dom kirin.  

	 

	Partiya Wekhevî û Demokrasiyê ya Gelan (DEM Partî) tevî ku AKP hezaran polîs û leşker veguhestibûn Gever û Colemêrgê, di hilbijartinên herêmî de bû partiya yekem. Li gorî agahiyên nehatine piştrastkirin DEM Partî li navenda Colemêrgê 14 hezar û 382, AKP jî 13 hezar û 732 deng girtin. Bi van encaman şaredarî ji sedî 48.88 dengan derbasî DEM Partiyê bû. 

	 

	Di navçeya Gevera Colemêrgê de DEM Partî 21 hezar û 591, AKP jî 2 hezar û 784 deng girtin. DEM  Partî bi rêjeya dengan a ji sedî 76.52’an li Geverê serkeftineke dîrokî bi dest xist. 

	 

	AKP bi veguhestina deh hezaran polîs û leşkeran û bi bikaranîna hemû derftên dewletê şaredariyên Şemzînan, Çelê û bajarokê Bajêrgeyê bi ferqên biçûk xesp kir. 

	 

	GEL POLÎTÎKAYÊN QIRÊJ VALA DERXIST

	 

	Namzeta hevşaredariya Colemêrgê ya DEM Partiyê Viyan Tekçe di pîrozbahiyan de anî ziman gelê Geverê hemû listikên qirêj ên AKP’ê vala derxist. Tekçe da zanîn ku ew ji serkeftina gel şanaz û serbilind in.  

	 

	EM Ê JI TALANKARAN HESABÊ BIPIRSIN’

	 

	Namzetê din ê hevşaredariyê Mehmet Siddik Akiş jî wiha axivî: “Dema em derbasî şaredariyê bûn, wekî ku me soz daye dê bi rê ve bibin. Em ê sozên xwe yek bi yek bi cih bînin. Em ê ji kesên pereyên gel dizîne li pêşiya daraza hesabê bipirsin. Em ê bajar bi kesên deng dane û nedane re, bi hev re bi rê ve bibin.”

	 

	‘LI DIJÎ KONTRAYAN CIWAN BI SER KETIN’

	 

	Parlamentera DEM Partiyê ya Colemêrgê Oznûr Bartin jî diyar kir ku li dijî hêzên kontra li bajêr serkeftin bi dest xistin û wiha got: “Li dijî çeteyan, zilmkaran, herkesê ku dijminê vî gelî ye serkeftinek bi dest xist. Gelê Colemêrgê û ciwanana li dijî kontrayan serkeftinek bi dest xist. Ked û dilê herkesê sax be. Em bi ciwanan hebûn, em hene, em ê hebin. Kesên li dijî gelê kurd serî li lîstikên qirêj dan li dijî van ciwanan bersiva pêwîst wergirt.”

	 

	Parlamenterê DEM Partiyê Vezîr Coşkûn Parlak jî anî ziman ku di pêvajoya hilbijartinê de piştgiriya herî mezin ciwanan daye wan û got: “Ciwanên Kurdistanê li her derê peyamên pêwîst dan. Weke ku Serokatiyê jî got; me bi ciwanî dest pê kir, em ê bi ciwanî serbikevin. Kontrayan winda kir, ciwan bi serketin.”