
Parêzerê Atalay ê wekîltiya wî hate betalkirin: Ev darbeyeke sivîl e

2024-01-31 10:05:41


	STENBOL - Parêzerê Can Atalay, Kemal Aytaç diyar kir ku betalkirina wekîltiya muwekîlê wî darbeyeke sivîl e û wiha got: “Bêhêvîtî nîne, têkoşînê bidomînin. Niha divê em dakevin kolanan. Têkoşîna demokratîk li kolanan tê dayîn.”

	&nbsp;

	3’yemîn Daîreya Ceza ya Dadgeha Bilind, du biryarên binpêkirinê yên Dadgeha Destûra Bingehîn (AYM) derbarê parlamenterê Partiya Karkerên Tirkiyeyê (TÎP) Can Atalay ê girtî de dan nas nekirin. Dadgeha Bilind biryar da ku “nirxa hiqûqî” ya biryara binpêkirinê nîne û divê li gorî biryara AYM’ê neyê tevgerandin. Biryar duh li Meclisê hate xwendin û wekîltiya Atalay hate betalkirin. Parêzerê Atalay, Kemal Aytaş biryara ku bû sedema bertekan nirxand.&nbsp;

	&nbsp;

	

	Parêzerê Atalay, Kemal Aytaş

	&nbsp;

	‘DARBEYA SIVÎL E’&nbsp;

	&nbsp;

	Prz. Aytaç diyar kir ku biryar “yek ji biryarên rûreş ku Meclisê wergirtiye ye” û wiha berdewam kir: “Tevî biryarên AYM’ê wekîltiya parlamenterekî bi dengên gel hatiye hilbijartin hate betalkirin. Ev yek di heman demê de xwe înkarkirine. Qebûlkirina vê li dijî demokrasî, hiqûq û Destûra Bingehîn e. Wekî din îzaheke vê yekê nîne. Biryarên AYM’ê jî vekirî ne û herkesê eleqedar dike. Ev yek weke darbeyeke sivîl derketiye holê.”

	&nbsp;

	Aytaç, wiha dirêjî da axaftina xwe: “Li gorî min Serokkomar Tayîp Erdogan û derdora wî hatina Can Atalay a Meclisê weke serkeftina Geziyê dîtin. Ji ber vê yekê mûameleke taybet li Atalay kirin û bi derketina derveyî hiqûqê ev yek danîn holê. Doza Geziyê du caran hate beraetkirin. Lê doz dubarekirin û dîsa vekirin. Bi dadger taybet û tayînkirî ev biryar dan. Armanca wan ew e ku Geziyê mehkûm bikin. Ez difikirim ku li dijî Selahattîn Demîrtaş û Osman Kavala kîn û dijminatiyeke Erdogan heye.”&nbsp;

	&nbsp;

	‘BÊHÊVÎTÎ NÎNE, TÊKOŞÎNÊ BIDOMÎNIN’&nbsp;

	&nbsp;

	Aytaç, got ku “bêhêvîtî nîne, têkoşînê bidomînin” û diyar kir ku desthilatê hewl da gel bêdeng bike. Aytaç, îşaret kir ku meseleya esas ne Atalay e û wiha berdewam kir: “Mesele, meseleya demokrasiya welatekê ye. Hewl didin me çavtirsandî bikin û biqûtifînin. Lê em ê teslîmî vê yekê nebin. Em ê zêdetir dengê xwe bilind bikin û zêdetir çalakiyan li dar bixin.”

	&nbsp;

	Aytaç, da zanîn ku dê hewldanên xwe yên hiqûqî bidomînin û ev tişt gotin: “Em dibînin ku biryarên dadgehê bi awayekî fîîlî pêk naînin. Ji ber wê yekê divê mirov tenê li benda biryarên dadgehê nebe. Divê hem li qada netewî hem jî navnetewî têbikoşin û zexta lê bikin.”

	&nbsp;

	Aytaç, bi lêv kir ku divê hemû beşên civakê hêza xwe bikin yek, li ber xwe bidin û wiha got: “Divê êdî derkevin kolanan. Ji ber ku demokrasî li kolanan derdikeve holê. Têkoşîna demokratîk li kolanan tê dayîn. Heta ku dernekevin kolanan ne pêkan e ku mafekê bi dest bixin û pêş ve biçin. Ji ber vê yekê divê zexteke girseyî û bibandor ku bi desthilatê paş ve gavê bide avêtin were avakirin.”

	&nbsp;

	DI 1’Ê SIBATÊ DE DÊ LI ÇAGLAYANÊ BIBIN

	&nbsp;

	Aytaç, diyar kir ku dê biryarê şermezar bikin û da zanîn ku dê di 1’ê sibatê de li Edliyeya Stenbolê ya li Çaglayanê, Nobeta Edaletê pêk bînin.&nbsp;

	&nbsp;

	MA / Omer Îbrahîmoglû

	&nbsp;

	&nbsp;