
Saziyên zimanê kurdî: Wê operasyonên we serê me netewînin  

2023-10-02 14:41:05


	NAVENDA NÛÇEYAN - Sazî û dezgehên ziman bi daxuyaniyeke hevpar bertek nîşanî operasyonên binçavkirinê dan û gotin: “Em ê serê xwe netewînin."&nbsp;

	&nbsp;

	Polîsan di saetên serê sibê de li Stenbol û Kirklareliyê bi awayekî hemwext bi ser gelek malan de girtin. Di serdegirtinên malan de endam û rêveberên Kongreya Demokratîk a Gelan (HDK), Partiya Demokratîk a Gelan (HDP) û rêxistinên sivîl ên civakî di nav de herî kêm 20 kes hatin binçavkirin. Kesên sedemê binçavkirina wan nehatin zanîn birin Miduriyeta Polîsan a Stenbolê. Hate diyarkirin ku dibe hejmara binçavkiriyan zêde bibe.&nbsp;

	&nbsp;

	Di nav van kesên hatine binçavkirin de Hevserokê Komeleya Lêkolînên Kurdî (Enstîtuya Kurdî ya Stenbolê) Eyup Subaşi jî heye. Saziyên ziman bi daxuyaniyeke hevpar bertek nîşanî binçavkirinan dan.&nbsp;

	&nbsp;

	Daxuyaniya nivîskî ku li ser hesabên medya dîjîtal ên saziyan hat belavkirin, wiha ye:&nbsp;

	&nbsp;

	‘HÛN NIKARIN SERÊ ME BITEWÎNIN'&nbsp;

	&nbsp;

	"Îro serê sibehê li du bajaran di bin navê operasyonê de li dijî rêveber û hevserokên sazî û dezgehên kurdan qirkirineke siyasî hate birêvebirin. Hevserokê Komeleya Lêkolînên Kurdî mamoste Eyyub Subaşi jî tê de gelek kes bi qedexeya agahîjêgirtinê û manîpulasyoneke bi destê Walîtiya Stenbolê hatî kirin, hatin binçavkirin. Em van hêrîş û operasyonên neheq û nehiqûqî bi tundî şermezar dikin û bi dengekî bilind tînin ziman ku dê serê me netewînin!

	&nbsp;

	Ev qirkirina siyasî, ne nû ye; her carê kesên din ên pêşeng ji xwe re dike hedef. Ji avabûna Komara Tirkiyeyê heta roja îro geh bi asîmîlasyonê, geh bi girtina sazî û dezgehan û geh jî bi qirkirinên siyasî hedef her bûye saziyên zimên û siyasî, xebatên sazî û dezgehên kurdan û axirî bûye gelê kurd. Hincet û senaryo guherîne, lê qedexe, binçavkirin, girtin û kuştin tu carî neguherinê. Wek saziyên zimên, em jî vê qirkirinê parçeyekî ji polîtîkaya dewleta tirk a sed salan dibînin û banga hestiyarî û xwedîlêderketinê di serî de li gelê kurd û pê re jî li hemû sazî û derdorên demokratîk dikin ku li hemberî van hêrîşan bêdeng nemînin.&nbsp;

	&nbsp;

	Em careke din ji vir didin zanîn ku rê û têkoşîna hevalên me ya me ye û dê gelê kurd û sazî û dezgehên gelê kurd li ber van hêrîş û zextan tu carî serê xwe netewînin û ji têkoşîn û xebatên xwe gavekê jî ber bi paş ve neavêjin! Ji ber ku gelê kurd destkeftiyên xwe bi rehetî bi dest nexistine, lewma tu hêz nikare van destkeftiyan bi binçavkirinan û tirsandinê tune bike.&nbsp;

	&nbsp;

	BINÇAVKIRIYAN BERDIN

	&nbsp;

	Hemû hevalên me yên ku îro hatine binçavkirin û hemû hevalên me yên din ên ku bi awayekî nehiqûqî, bi awayekî dijminkarane hatine girtin, em bi wan re ne û xwedî li têkoşîna wan derdikevin.&nbsp;

	Em ji bikerên van kiryarên neheq re dibêjin, hemû hevalên me derhal serbest berdin û wekî hemû zext, tundî û hêrîşên li gelê kurd hatî kirin, ev jî pûç in û dê me û hevalên me ji rêya azadî û wekheviyê dûr nexin û em ê ji her demê bêhtir xwedî li vê têkoşînê û destkeftiyên gelê kurd derkevin!"&nbsp;

	&nbsp;

	Navê sazî û dezgehên ku daxuyaniyê îmze kirine wiha ne:&nbsp;

	&nbsp;

	
		Enstîtuya Kurdî ya Amedê - Amed
	
		Enstîtuya Kurdî ya Stenbolê - Stenbol
	
		Komeleya Lêkolînên Çand û Ziman a Avestayê - Îzmîr
	
		Komeleya Lêkolînên Çand û Ziman a Botanê - Sêrt
	
		Komeleya Lêkolînên Çand û Ziman a Feradê - Semsûr
	
		Komeleya Lêkolînên Ziman û Çandê ya Arî-Derê - Êlih
	
		Komeleya Lêkolînên Ziman û Çandên Mezopotamyayê - Amed
	
		Komeleya Navenda Lêkolînên Ziman, Çand û Hunerê ya Arsîsayê - Wan
	
		Komeleya Wêjekarên Kurd - Amed
	
		Komeleya Ziman û Çandê ya Birca Belek - Cizîr
	
		Komeleya Ziman, Çand û Hunerê ya Ankayê - Enqere
	
		Kovara Destarê - Amed


	&nbsp;