
Dadgeh: Komeleya Jinan Rosa di bin banê PKK'ê de nehatiye avakirin  

2023-09-16 09:02:56


	&nbsp;

	AMED - Dadgehê der barê Rêvebera Komeleya Jinan a Rosayê Elîf Tîrenç Îpek Ûlaş de biryara beraetê da. Di sedema beraetê de, dadgehê ji bo îdiaya ku komeleyê girêdayî rêxistinê ye got: "Hatiye fêmkirin ku ne komeleyeke ku di bin banê PKK'ê de hatiye avakirin."

	&nbsp;

	Ji ber îfadeyên kesê bi navê Ecevît Yildiz ku ji ber ku hevjîna wî ya dixwest dev jê berde tevlî xebatên Komeleya Jinan a Rosayê bûye û îfadeyên şahidekî veşarî, der barê endam û rêveberên komeleyê de bi îdiaya "endamtiya rêxistinê" lêpirsîn hatibû destpêkirin. Di doza der barê endama lijneya rêvebir a komeleyê Elîf Tîrneç Îpek Ûlaş de, dadgehê biryara beraetê da.

	&nbsp;

	Dadgehê sedema biryara xwe ya beraetê eşkere kir. Dadgeha Cezayê Giran a 8'an a Amedê delîlên heyî nirxand û guh li şahidê veşarî "ZS35SN58UV52PG10" kir. Dadgehê diyar kir ku beyanên şahidê veşarî ne şênber in û got: "Ji bo xalên di beyanên şahidê veşarî de hatine destnîşankirin, tu delîl bi dest neketine."&nbsp;

	&nbsp;

	Dadgehê di biryara xwe de got: "Di qeyda şopandinê de û di dokumanên hatine bidestxistin de hatiye fêmkirin ku komele di bin banê PKK'ê de nehatiye avakirin û ne berdewam wê ye."&nbsp;

	&nbsp;

	Piştî eşkerekirina sedema biryara beraetê Dozgeriya Komarê ya Amedê jî ji bo xerakirina biryara beraetê serî li Dadgeha Edliye ya Herêmê ya Amedê da.&nbsp;

	&nbsp;

	&nbsp;