
Meclisa Leşkerî ya Minbicê bîlanço eşkere kir:  53 çete hatin kuştin 

2023-09-10 15:35:08


	NAVENDA NÛÇEYAN - Meclisa Leşkerî ya Minbicê bîlançoya êrişên dewleta tirk û komên wê yên paramîlîter parve kir û da zanîn ku di pevçûnan de 53 endamên komên paramîlîter hatine kuştin û 127 jî birîndar bûne.&nbsp;

	Meclisa Leşkerî ya Minbicê têkildarî êrişên dewleta tirk û komên wê yên paramîlîter ên li dijî gundewarên Minbicê û hedefgirtina jîngehan daxuyaniyek parve kir. Navenda Ragihandinê ya Hêzên Sûriya Demokratîk (HSD) daxuyanî parve kir. Li gorî nûçeya Ajansa Nûçeyan a Hawarê (ANHA); meclisê destnîşan kir ku dewleta tirk piştî destpêkirina operasyona “Xurtkirina Ewlehiyê” ya li Dêrazorê, ji bo ku piştgiriyê bi komên paramîlîter re êrişên xwe yên li dijî herêmê zêde kirin.

	&nbsp;

	53 ENDAMÊN KOMÊN PARAMÎLÎTER HATIN KUŞTIN

	&nbsp;

	Bi domdarî Meclisa Leşkerî da zanîn ku di encama bersivên hêzên wan de 53 endamên komên paramîlîter hatine kuştin, 127 jê hatine birîndarkirin, 9 wesayît û panzêr hatine rûxandin û hêzên wan dest danîne ser gelek çek û cebilxaneyan. Meclisê daxuyand ku di nava cenazeyên kmên paramîlîter de endamên DAIŞ’ê hebûn û wiha got: “Nîşaneyên rêxistina terorîst ên li ser cilên wan ev yek piştrast kir. Piştî têkbirina êrişan, çete reviyan.”

	&nbsp;

	3 ENDAMÊN MECLISÊ JIYANA XWE JI DEST DAN

	&nbsp;

	Meclisê, destnîşan kir ku 3 şervanên wan di şer de jiyana xwe ji dest dane, 6 şervan birîndar bûne û endamekî hikûmeta Şamê mirî ye û 4 jî birîndar bûne.&nbsp;

	&nbsp;

	Bi domdarî di daxuyaniyê de ev agahî hatin parvekirin: “Di dema êrişên li dijî gundewarên Minbicê de, bombeyek bi erebeyeke Hêzên Ewlekariya Hundirîn ve teqiya û 4 endam şehîd bûn. Her wiha bombeyek bi erebeya endamê Nivîsgeha Têkiliyên Leşkerî Bozan Osman ve hate teqandin û Bozan Osman şehîd bû. Her wiha di êrişan de 5 sivîl şehîd bûn û 4 jî birîndar bûn. Çeteyan 2 sivîl ji gundê Mehsenliyê revandin.”&nbsp;

	&nbsp;

	‘HEMÛ ÊRIŞ HATIN TÊKBIRIN’&nbsp;

	&nbsp;

	Daxuyanî wiha dom kir: “Di êrişên li dijî jîngehan de çekên giran bi kar anîn. Lewma gelek sivîl bûn qurbanî û ziyanên mezin gihiştin mal û milkên wan û binesaziya herêmê. Lê tevî êrişên dijwar û hedefgirtina sivîlan jî şervanên me bi lehengî li ber xwe dan û hemû êriş têk birin. Nehiştin çete yek bostê nêzî axa me bibin. Em şervanên xwe silav dikin û spasiya xelkê Minbicê dikin ku di aliyê manewî de piştgiriya hêzên me kir. Her wiha ciwanên Minbicê silav dikin ku cihê xwe di eniyên şer de girtin û li rex hêzên me yên leşkerî li ber xwe dan.&nbsp;

	&nbsp;

	BÎLANÇOYA ŞER Û PEVÇÛNAN

	&nbsp;

	Bîlançoya giştî ya êrişên çend rojên dawîn wiha ye: “53 endamên komên paramîlîter hatin kuştin, 127 jê birîndar bûn, 9 erebe û panzer hatin rûxandin, 6 çekên doçkayê hatin rûxandin, 61 bendên komên paramîlîter hedef hatin girtin, 5 cenazeyên komên paramîlîter hatin desteserkirin, balafireke keşfê hat xistin, 7 çekên kalaşnîkofê hatin desteserkirin, 2 çekên BKC, topavêjek B7, bêtêlek, 5 topên B7, 5 mexzenên kalaşnîkofê, sindoqek guleyên BKC’yê, çekeke Lavê û 2 balafirên bêmirov hatin rûxandin. Her wiha leşkerekî rejîma Sûriyeyê hate kuştin, 4 leşkerên rejîmê birîndar bûn, 5 sivîl şehîd bûn, 4 sivîl birîndar bûn, 2 sivîl ji aliyê çeteyan ve hatin revandin, 3 şervan şehîd bûn, 6 şervan birîndar bûn.”

	&nbsp;

	Herî dawî jî Meclisa Leşkerî gundên hatine hedefgirtin wiha rêz kir: “Kilkawî, Um Edese, Yaşlî, Ereb Hesen, Mehsenlî, Ewn Dadat, Elqane, Yanlî, Boyhic, El Bûgaz, Siyade, Mihêmîd, El Tûgax, El Cat û Kohyûk.”

	&nbsp;