
Li faîlên Dundar, Abayay û Aydin hatin pirsîn 

2023-07-22 14:41:59


	&nbsp;

	NAVENDA NÛÇEYAN - ÎHD’ê û malbatên windakiriyan di çalakiyên li Amed, Êlih û Îzmîrê de faîlên Mesût Dundar ê laşê wî bi pişt wesayîta zirxî ve hate kaşkirin, nûnerê Ozgur Halk ê Êlihê Çetîn Abayay ê di êrişa çekdarî de hate qetilkirin û Serokê HEP’ê yê Amedê Vedat Aydin ê piştî hate revandin hate qetilkirin pirsîn.&nbsp;

	&nbsp;

	Şaxa Komeleya Mafên Mirovan (ÎHD) ê Amedê û malbatên windakiriyan di hefteya 754’emîn a çalakiya xwe ya “Bila windakirî bên dîtin, faîl bên darizandin” de li ber Bîrdariya Mafê Jiyanê ya li Parka Koşûyolû ya navçeya Rêzan a Amedê hatin bahev. Di çalakiya ku pankarta wêneyên windakiriyan li ser hate vekirin de nûnerên rêxistinên sivîl ên civakî û malbatên windakiriyan tev li bûn. Seroka Şaxa ÎHD’a Amedê Abdûllah Zeytûn ê beriya daxuyaniyê axivî wiha got: “Li Tirkiyeyê di serî de pirsgirêka kurd divê hemû pirsgirêk bi rêya diyalogê bên çareserkirin.”

	&nbsp;

	Di çalakiya vê hefteyê de çîroka Mesût Dundar ê di tîrmeha 1992’yan de li navçeya Cizîr a Şirnexê hate qetilkirin, hate parvekirin. Endamê Komîsyona Windakiriyan ê Şaxa ÎHD’a Amedê Firat Akdenîz çîroka Dundar xwend.&nbsp;

	&nbsp;

	Piştî xwendina çîrokê çalakiya rûniştinê hate lidarxistin.&nbsp;

	&nbsp;

	ÊLIH&nbsp;

	&nbsp;

	ÎHD û malbatên windakiriyan di hefteya 590’emîn de li ber Bîrdariya Mafên Mirovan a Cadeya Gulistan a Êlihê hatin bahev. Di çalakiya pankarta “Bila windakirî bên dîtin, faîl bên darizandin” hate vekirin de malbatên windakiriyan, parazvanên mafên mirovan, endam û rêveberên Şaxên OHD û MEBYA-DER’ê yên Êlihê amade bûn. Rêveberê Şaxa ÎHD’a Êlihê Abdûrrahîm Boga yê di çalakiyê de axivî, anî ziman ku heta encamê bigirin wê têkoşîna xwe bidomînin.&nbsp;

	&nbsp;

	Di çalakiyê de çîroka Nûnerê Kovara Ozgur Halk Çetîn Abayay ê di 29’ê tîrmeha 1992’yan de li Êlihê rastî êrişa çekdarî ya 3 kesan hat û jiyana xwe ji dest da hate xwendin.&nbsp;

	&nbsp;

	Daxuyanî bi çalakiya rûniştinê bi dawî bû.&nbsp;

	&nbsp;

	ÎZMÎR&nbsp;

	&nbsp;

	Şaxa ÎHD’a Îzmîrê jî çalakiya xwe ya bi daxwaza “Bila windakirî bên dîtin, faîl bên darizandin” 2 hefteyan carekê li dar dixe vê hefteyê jî domand. Di daxuyaniyê de pankartên “Windakirî wijdan in, xwedî li wijdana xwe derkeve” û “Faîl diyar in windakirî li ku ne” hate vekirin. Vê hefteyê aqûbeta Serokê Partiya Kedê ya Gel (HEP) ê Amedê Vedat Aydin ê di 5’ê tîrmeha 1991’an de hate revandin û qetilkirin hate pirsîn. Sekreterê Şaxa ÎHD’a Îzmîrê Alî Aydin ê metna çapemeniyê xwend, çîroka Vedat Aydin vegot. Aydin di berdewama axaftina xwe de wiha got: “Di vê dosyayê de faîl nav bi nav diyar in, navnîşanên wan diyar in bila faîl bên darizandin. Bila parastina bi zirxê necezakirinê bi dawî bibe.”

	&nbsp;

	&nbsp;

	&nbsp;

	&nbsp;

	&nbsp;

	&nbsp;