Gilînameyên li girtîgeha Rihayê tên îmhakirin!  

2023-06-19 12:21:42


	 

	RIHA - Girtiyên li Girtîgeha Tîpa T a Hejmar 1 a Rihayê dimînin bal kişandin ser binpêkirinan û diyar kirin ku gilînameyên wan tên îmhakirin. 

	 

	Girtiyên siyasî yên li Girtîgeha Tîpa T a hejmar 1 a Rihayê têkildarî binpêkirinên li girtîgehê ji ajansa me re nameyek şandin. Girtiyan bal kişandin binpêkirinên di rojên dawî de û diyar kirin ku gilînameyên wan tên îmhakirin û ji meqamên peywirdar re nayên şandin. Binpêkirinên ku girtiyan ragihandin wiha ne: 

	 

	 “* Daxwaza me ya çûna odeya xizmên xwe û hevalên xwe yên ji heman sedemê hatin girtin, tê redkirin. 

	 

	* Gilînameyên me ji girtîgehê dernakevin. Tên îmhakirin. 

	 

	* Di dema sewqkirina nexweşxaneyê de sepanên keyfî tên ferzkirin. Dema em qebûl nekin jî nabin nexweşxaneyê. Ser re jî lêpirsînê didin destpêkirin. 

	 

	* Amûrên me yên tiraşê nadin me. Nahêlin em biçin berber û tiraş bibin. 

	 

	* Amûrên ku li kantînê tên firotin bi hinceta ‘ev qedexe ne’ tên desteserkirin. 

	 

	* Ji ber hewayê germ em dixwazin klîmayan bikirin lê li kantînê nayên firotin. 

	 

	* Hinek hevalên me cezayên wan xelas dibin lê bi hincetên vala nayên berdan. Bi awayekî keyfî înfazên wan dişewitînin. 

	 

	* Cil û bergên ku malbatên me di dema hevdîtinan de tînin an jî yên bi kargoyê tên şandin, nadin me. 

	 

	* Ev sepan jî bi destê dozgeriyê girtîgehê tên kirin. Dema em li cem wî gilî dikin an jî gilînameyan didin wî, naşîne.” 

	 

	Girtiyan bang li rêxistinên hiqûqê û hemû derdorên demokrat kirin ku bikevin nava liv û tevgerê û piştevaniyê bidin.