Throssell: Divê Tirkiye demildest hemû rojnamevanan berde  

2023-05-25 11:52:16


	CENEVRE - Berdevka Buroya Mafên Mirovan a NY’yê Liz Throssell diyar kir ku li Tirkiyeyê zextên li ser azadiya raman û derbirînê di asta fikaran de ye û bang kir ku rojnamevanên girtî hemû demildest bên berdan. 

	 

	Berdevka Buroya Mafên Mirovan a Neteweyên Yekbûyî (NY) Liz Throssell bersiva pirsên Ajansa Mezopotamya (MA) da û bal kişand ser zextên li rojnamevanan tên kirin. Throssell da zanîn ku ji ber ku nûnerên wan li Tirkiyeyê nînin têkildarî hûrguliyên dosyeyên rojnamevanên girtî agahî destê wan de tune ne û ber bi dawiya meha nîsanê ve derbarê binçavkirin û girtinan de bi rayedarên tirk re di nava pêwendiyan de ne û ew ji rayedarên tirk re fikarên xwe tînin ziman. 

	 

	FIKARÊN XWE ANÎNE ZIMAN 

	 

	Throssell anî ziman ku rojnamevan, parêzer û aktîvîst û gelek kes di bin navê “terorê” de tên tawanbarkirin û zext li ser wan tên kirin û di vî warî de berê jî fikarên xwe anîne ziman. Throssell da zanîn ku wan wek Buroya Mafên Mirovan a NY’yê demek dirêj e li ser qanûnên sûc û terorê şîroveyan dikin û ev rewşa heyî ya li Tirkiyeyê bandorek neyînî li ser mafên mirovan dike. 

	 

	BANGA BO BERDANA ROJNAMEVANAN 

	 

	Throssell destnîşan kir ku tevdîrên pêşîlêgirtina têkoşîna bi terorê û qanûna têkoşîna bi terorê re divê li gorî hiqûqa mafên mirovan a navneteweyî be û beşdariya siyasetê, xebatên parêzvanên mafên mirovan, azadiya derbirînê û ramanê di bin zextan de nebe. Throssell diyar kir ku ew rewşa li Tirkiyeyê ji nêz ve dişopînin û bang li rayedaran kir ku demildest rojnamevanên girtî hemû demildest bên berdan. 

	 

	MA / Ruştu Demîrkaya