Girtîgeha Tîpa T a Îskenderûnê hate valakirin 

2023-02-24 15:36:16


	 

	HATAY - Girtiyên li Girtîgeha Tîpa T a Îskenderûnê tên ragirtin bi hinceta “gefa ewlehiya hundir” sewqî girtîgehên Bolû û Hatayê hatin kirin. 

	 

	Girtîgeha Tîpa T a Îskenderûnê ya Hatayê ku di erdhejê de xesareke mezin gihiştiyê bi hinceta “gefa ewlehiya hundir” hate valakirin. Nêzî hezar girtiyên ku li girtîgehê tên ragirtin jî sewqî Girtîgehên Bolû û Edeneyê hatin kirin. Girtîgeha Tîpa M a Îskenderûnê jî rojên borî hatibû valakirin û girtî sewqî Edeneyê hatibûn kirin. 

	 

	‘DIVÊ NEBE PIRSGIRÊKA EWLEHIYA HUNDIRÎN’

	 

	Endama Komîsyona Girtîgehên Navendî ya Komeleya Mafên Mirovan (ÎHD) parêzer Mehtap Sert a diyar kir ku girtiyên li Girtîgeha Tîpa T a Îskenderûnê tên ragirtin duh sewqî Girtîgehên Bolû û Edeneyê hatin kirin, hevdîtina bi 21’ê sibatê bi girtiyan re kir bi bîr xist û wiha got: “Di dema erdhejê de nikarin girtîgehê bi rê ve bibin, hewl didin bi sirgunan bi rê ve bibin. Mirovan di girtîgehê de tirsa erdhejê jiya, malbatên xwe malên xwe winda kirin. Xizantir bûn. Divê dewlet yekbûna madî û manewî ya welatiyên xwe misoger bike. Berovajiyê vê roja hevdîtinê girtiyan vediguhêzin. Mafê wan ê êşa bi mirovên xwe re parve bikin ji destê wan digirin. Rewşa erdhejê jî weke gefa ewlehiya hundirîn dinirxînin û dikin. Afet qet ne pirsgirêka ewlehiya hundir e. Divê di çarçoveya mirovî de çareserî bên hilberandin.”