‘Dixwazin bi nûçeyan rojnamevanan ceza bikin’  

2023-02-24 12:37:19


	 

	ENQERE – Parêzer Resûl Temûr diyar kir ku îdianameya derbarê nûçegihanên MA’yê û JINNEWS’ê de hatiye amadekirin bi nûçeyan dixwazin rojnamevanan ceza bikin. 

	 

	Lêpirsîna Serdozgerê Komarê yê Enqereyê ku derheqê Midûra Karên Nivîsan a Ajansa Mezopotamyayê (MA) Dîren Yurtsever, nûçegihanên MA’yê Berîvan Altan, Ceylan Şahînlî, Denîz Nazlim, Selman Guleryuz, Emrûllah Acar û nûçegihanên JINNEWS’ê Habîbe Eren û Oznûr Deger ku girtî ne û nûçegihana MA’yê Zemo Aggoz û Mehmet Gunhan ê ku demekî kin li Buroya MA’yê ya Enqereyê weke stajyer xebitî bû û negirtî tên darizandin de dabû destpêkirin, doz hat vekirin. Danişîna ewil a dozê dê di 16’ê gulanê de bê lidarxistin. 

	 

	Îdianame ji 210 rûpelan pêk tê û îdianame ji 149 nûçeyên MA’yê, îfadeyên rojnamevanan ên li dozgeriyê, îfadeyên şahidên veşarî û eşkere û dîroka PKK-KCK’ê pêk tê. 4’emîn Dadgeha Cezayê Giran a Enqereyê ku îdianameyê qebûl kir daxwaza berdana rojnamevanan red kir. 

	 

	JI BER XEBATÊN XWE MESLEKÎ HATINE GIRTIN 

	 

	Parêzerê rojnamevanan Resûl Temûr îdianameyê nirxand û destnîşan kir ku îdianame jî radixe ber çavan ku her 9 rojnamevan jî ji ber xebatên xwe meslekî hatine girtin û got: “Îdianame li ser nûçeyên Ajansa Mezopotamya hatiye nivîsandin. Armanca vê îdianameyê ne hiqûqî ye. Dixwazin bi îdianameyên wiha xebatên rojnamevaniya kurdî bidarizînin.” 

	 

	

	Resûl Temûr

	 

	‘DIXWAZIN BI NÛÇEYAN CEZA BIKIN’

	 

	Temûr destnîşan kir ku dozgeriyê beşek nûçeyên ji MA’yê bijartine û dixwazin li ser vê sûc û delîl peyda bikin û wiha got: “Dozger nûçeyên din ên ajansê ji nedîtî ve hatiye. Dozger dixwaze ji ber nûçeyên kurdan û pirsgirêka kurd eleqedar dike bike sedema cezakirinê. Dixwaze naveroka nûçeyan ceza bike. Bi vî awayî jî dixwaze rojnamevaniya kurdî bike hedef. Dixwaze bi nûçeyên navborî û rojnamevanên tên darizandin têkiliya wançêke û ji vir jî eşkere dibe ku dozgerî bi kêfî tevdigere. Yek nûçe jî nabe ku bikin mijara sûc. Yek nûçe jî ne di asta cezakirinê de ye. Dixwazin bi nûçeyan rojnamevanan sûcdar û ceza bikin. 

	 

	MA / Ozgur Paksoy