Li Efrînê navendên tecawizê 

2023-01-19 11:21:39


	NAVENDA NÛÇEYAN - Dewleta tirk û komên paramîlîter ên girêdayî wê 5 sal berê Efrîn dagir kiribûn. Hat zanîn ku navê “Emanet” li jinên bi darê zorê hatine revandin tê kirin û li navendan rastî îşkenceya zayendî û destdirêjiyê tên. 

	 

	Dewleta tirk û komên paramîlîter ên girêdayî wê di 20’ê çileya sala 2018’an de êrişî Kantona Efrînê ya Bakur û Rojhilatê Sûriyeyê kir. Di 18’ê adarê de jî navenda bajar dagir kirin. Di nava 5 salên dagirkeriyê de Efrîn veguherandin navenda îşkence û tecawizê. Li gorî ANHA’yê; li gund, navçe û navenda Efrînê 26 navend hatine avakirin ku 8 hezar û 644 welatî lê tên ragirtin. 

	 

	Navendên ku sûcên li dijî mirovahiyê li jinan tên kirin ev in: 

	 

	* Girtîgeha El Mehkemê li avahiya avahiya edliyeyê ya berê ye. Bi taybet jî jinên ji navçeyên cuda yên Efrînê hatine revandin li vir tên ragirtin. Ev girtîgeh ji hêla koma paramîlîter a Cebha El Şamiye ve tê birêvebirin. 

	 

	* Girtîgeha El Mehmûdiyeyê ji hêla koma paramîlîter a El Hemza ve tê birêvebirin. Bi dehan welatiyên hatine revandin li vir tên ragirtin. Li vê girtîgehê ji bo jinan 2 odeyên taybet hene. 

	 

	* Girtîgeha Dibistana Itîhad El Erebî li Efrînê ye. Ji hêla koma paramîlîter a bi navê Cebhe El Şamiyeyê ve tê birêvebirin. Ji bo jinan beşeke taybet hatiye avakirin. Piştre jî veguherandin baregeha leşkerî. 

	 

	* Girtîgeha Dibistana El Kerameyê ji yek dibistanên Efrînê yên berê ye. Ji hêla koma paramîlîter a Feyleq El Şamê ve tê birêvebirin û ji bo jinan beşeke wê ya taybet heye. 

	 

	* Girtîgeha Meclisa Qanûndanînê ya Berê li navenda bajêr e. Weke “Girtîgeha Jinan” tê zanîn. Jinên ku hatine revandin li jêrzemîna wê tên ragirtin. Bi taybet jî kurdên ji hêla îstîxbarata dewleta tirk û komên paramîlîter ve hatine revandin li vê girtîgehê tên ragirtin. 

	 

	Li gorî çavkaniyan, 50 jin li vê girtîgehê tên ragirtin. Navê “Emanet” li jinên hatine revandin hatiye kirin. 

	 

	96 JIN HATIN QETILKIRIN

	 

	Di vê pêvajoyê de tacî û tecawiz li sedan jinan hate kirin. Li gorî daneyên Rêxistina Mafên Mirovan a Sûriye-Efrînê, di nava 5 sala de herî kêm 96 jin hatin qetilkirin û 72 jin jî hatin tecawizkirin.