
Qetlîama Parîsê û binçavkirina rêveberên DBP’ê hat protestokirin 

2022-12-24 16:45:04


	NAVENDA NÛÇEYAN – Qetlîama li Parîsê û binçavkirina rêveberên DBP’ê li gelek bajaran bi daxuyaniyan hat protestokirin. Di daxuyaniyan de wiha hat gotin: “Kurd li dijî qetlîaman bêdeng neman û wê îro jî bedeng nemînin.”&nbsp;

	&nbsp;

	Duh di çarçoveya lêpirsîna ku Serdozgeriya Komarê ya Amedê li dijî DBP’ê da destpêkirin, polîsan bi ser avahiyên DBP’ê yên 9 bajaran de girt. Hevserokê Giştî yê DBP’ê Keskîn Bayindir û hevserokên bajaran hatin binçavkirin. Di van kêliyên ku operasyona li dijî DBP’ê dihat şermezarkirin, agahiya êrişa çekdarî ya li dijî Navenda Çanda Kurd a Ahmet Kaya ya li Parîsê belav bû. Di êrişê de 3 welatiyên kurd hatin qetilkirin û sê welatî jî birîndar bûn.&nbsp;

	&nbsp;

	Rêxistinên HDP’ê û saziyên sivîl qetlîama li Parîsê û operasyona li dijî DBP’ê bi daxuyaniyan şermezar kirin.&nbsp;

	&nbsp;

	COLEMÊRG

	&nbsp;

	Rêxistina HDP’ê ya Geverê operasyona li djî DBP’ê û Qetlîama Parîsê protesto kir. Daxuyanî li ber avahiya HDP’ê pêk hat û gelek kes tev li bûn. Parlamenterê HDP’ê yê Colemêrgê Saît Dede diyar kir ku bi sed salan e li dijî gelê kurd polîtîkayên komkujiyê tên kirin û duh li Parîsê qetlîamek li qetlîamên ser kurdan zêde bûye. Dede da zanîn ku qetlîam bi zanebûn hatiye kirin û xwest her kes li ber vê qetlîamê rabe.&nbsp;

	&nbsp;

	Dede operasyona qirkirina siyasî ya li dijî DBP’ê jî şermezar kir û sedema vê operasyonê ew e ku tê xwestin kurdan derveyî siyasetê bên hiştin.&nbsp;

	&nbsp;

	Rêxistina HDP’ê ya Colemêrgê jî HDP Colemêrg jî daxuyanî da û Hevserokê HDP’a Bajêr Lokman Ozdemîr diyar kir ku her roja ku diçe zext û qetlîam li ser gelê kurd zêde dibin û ew ê li dijî êrişan li ber xwe bidin.&nbsp;

	&nbsp;

	&nbsp;WAN

	&nbsp;

	Navenda Çand û Hunerê ya Aryen a Wanê jî li ber avahiya xwe daxuyanî da û qetlîama li Parîsê şermezar kir. Gelek kes tev li daxuyaniyê bûn. Muzîkjen Baran Sari axivî û bang li hikumeta Faransayê kir ku kujeran derxe holê. Sari anî ziman ku hêzên tarî dixwazin gelê kurd tune bikin û ji vê qetlîamê jî tê fêmkirin ku hêzên tarî carek din dixwazin çand, ziman, huner û hebûna kurdan tune bikin.&nbsp;

	Piştî daxuyaniyê çalakiya rûnştinê hat lidarxistin. Di çalakiyê de stranek ku hunermend Mîr Perwer digot, hat strandin.&nbsp;

	&nbsp;

	ÊLIH

	&nbsp;

	Li Êlihê jî Rêxistina HDP’ê ya Bajêr li ber avahiya xwe qetlîama li Parîsê şermezar kir. Berdevka Meclisa Jinan a HDP’ê Ayşe Acar Başaran, Parlamenterên HDP’ê Feleknas Uca, Huseyîn Kaçmaz, Remziye Tosun, Mehmet Ruştu Tiryakî û Necdet Îpekyuz, aktîvîstên TJA’yê, Dayikên Aştiyê, rêveberên Navenda Çanda Biharê, ARÎ-DER, Hevşaredarên Êlihê yên qeyûm tayînî şûna wan hatiye krin, rêveberên HDP, DBP û gelek kes tev li bûn.&nbsp;

	&nbsp;

	Parlamentera HDP’ê Feleknas Ûca qetlîamê şermezar kir û got: “Heke qetilkirina 3 jinên kurd a 10 sal berê bihata ronîkirin, wê îro ev qetlîam pêk nehata. Qetlîama ji aliyê Omer Guney di 9’ê Çileya 2013’an de pêk hat nehat ronîkirin. Heke di destê wî de agahiyên MÎT’ê dane wî nebûna nikaribû qetlîamê pêk bîne. Îro li her derî li dijî kurdan suikast tên kirin. Li Rojava, li Silêmaniyê kurdan dikin hedef. Îktidara AKP-MHP’ê ji bo her tiştî daxuyanî dide, hê ji bo vê qetlîam3e daxuyanî nedaye. Ji bo sê welatiyên kurd çima daxuyanî nade? Nexwê rijandina xwîna kurdan we kêfxweş dike. Lewma divê bi hemû awayî qetlîam were ronîkirin. Çi li dinyayê diqewime, kurd dibin hedef û bazar. Kurd bêdeng nebûn û wê ji niha şûn ve jî nebin. Ji ronîkirina qetlîamê hikûmeta Fransayê berprisiyar e.”

	&nbsp;

	HATAY&nbsp;

	&nbsp;

	Rêxistina HDP’ê ya Navçeya Îksenderûnê jî li ber avahiya xwe operasyona li dijî DBP’ê û Qetlîama Parîsê şermezar kir. Hevserokê HDP’a Îskenderûnê Abdurrahîm Şahîn daxuyanî da û got her ku îktidar têk diçe êrişî kurdan dike û divê êriş û qetlîamên li dijî kurdan bi dawî bibin.&nbsp;