
‘Êrişî destkeftiyên Rojava dikin’ 

2022-11-23 15:27:16


	&nbsp;

	RIHA - Kesên ku dixwestin êrişên hewayî yên dewleta tirk li ser sînorê Kobanê protesto bikin, di ketina Pirsûsê de hatin astengkirin. Hevseroka DBP’a Rihayê Hîdayet Enmek bertek nîşan da û wiha got: “Ji bo tunekirina destkeftiyên li Rojava, tişta ku ji destê wan tê dikin.”&nbsp;

	&nbsp;

	Kongreya Civaka Demokratîk (KCD), Tevgera Jinên Azad (TJA), Partiya Herêmên Demokratîk (DBP) û Partiya Demokratîk a Gelan (HDP) li dijî êrişên dewleta tirk ên li ser Bakur û Rojhilatê Sûriyeyê û Herêma Federe ya Kurdistanê xwest bi dirûşma “Ji şer û dagirkeriyê re Na”, li navçeya Pirsûs a Rihayê ya li ser sînorê Kobanê meşekî li dar bixin. Lê belê beriya meşê navçe hat dorpêçkirin û hemû rêyên ketin û derketina navçeyê hatin girtin. Her wiha Bûlwara Ataturk ku Peykerê Hinarê lê ye û dê girse li wir kom bûbûya jî bi bariyerên hesin hat dorpêçkirin.&nbsp;

	&nbsp;

	NEHIŞTIN PARLAMENTER BIKEVIN NAVÇEYÊ

	&nbsp;

	Hevseroka Giştî ya DBP’ê Saliha Aydenîz, Parlamenterên HDP’ê Ayşe Surucu, Omer Ocalan, Nûsrettîn Maçîn, Siddik Taş û gelek welatiyên ku ji bo meşê dixwestin derbasî navçeyê bibin jî di ketina Taxa Alîgorê de hatin astengkirin. Girse, ji hêla bi sedan leşkeran ve hat dorpêçkirin.&nbsp;

	&nbsp;

	Gelê Pirsûsê ku li pêşiya Navenda Çandê ya Amarayê kom bû, bertek nîşanî astengkirina girseyê da. Piştre jî bi sedan kes çûn avahiya Rêxistina HDP’a Pirsûsê û di bin dorpêça polîsan de daxuyanî dan. Hevseroka HDP’a Rihayê Hîdayet Enmek di daxuyaniyê de axivî û got ku wan îro pergala hiqûqnenas a zîhniyeta faşîst a AKP-MHP’ê careke din dîtine.&nbsp;

	&nbsp;

	‘HEMAN ZÎHNIYETE’&nbsp;

	&nbsp;

	Bi domdarî Enmek bertek nîşanî astengkirina Hevseroka Giştî ya DBP’ê Saliha Aydenîz û parlamenteran da û wiha domand: “Ev sê roj in êrişî Rojava dikin. Zêdetirî du roj in bi obûsan Kobanê û gundên wê topbararan dikin. Kobanê di sala 2015’an de ji DAIŞ’ê hat rizgarkirin. Ew ruhê wê demê îro xwe dîsa nîşan dide û kesên dixwazin wî ruhî tune bikin dîsa êriş dan destpêkirin. Ev yek nîşan dide ku tu ferq û cudahî di navbera zîhniyeta wê demê êriş dikir û ya niha êriş dike de nîne. Ji bo tunekirina destkeftiyên li Rojava, tişta ku ji destê wan tê dikin. Divê gelê Pirsûs, Riha û Kurdistanê li dijî van êrişan bêdeng nemîne. Divê neyê jibîrkirin ku kurd dê destkeftiyên xwe yên li her çar parçeyan biparêzin.”

	&nbsp;

	Daxuyanî bi dirûşma “Bijî berxwedana Kobanê” bi dawî bû.&nbsp;

	&nbsp;