
Li Girtîgeha Kalkandereyê dest danîn ser pirtûk, televîzyon û sarincên girtiyan 

2022-11-17 12:51:52


	&nbsp;

	NAVENDA NÛÇEYAN - Girtiyê bi navê Veysî Esen ku li Girtîgeha Tîpa L a Kalkandere ya Rîzeyê tê ragirtin diyar kir ku rêveberiya girtîgehê dest daniye ser televîzyon, sarinc û pirtûkên girtiyan û wiha bang kir: “Daxwaza me ew e ku saziyên têkildar bên serdana girtîgehê û binpêkirinên li vir di cih de bişopînin.”&nbsp;

	&nbsp;

	Hevdîtinên bûdçeya Wezareta Dadê ya sala 2023’yan ên li Meclisê didomin. Wezîrê Dadê di hevdîtinên bûdçeyê de îdia kir ku di serdema desthilatdariya AKP’ê de li girtîgehan îşkence û binpêkirin bi dawî bûne. Di demekî ku Bozdag îşkence û binpêkirin înkar dikir de agahiyeke nû ya binpêkirinan jî ji Girtîgeha Tîpa L a Kalkandere ya Rîzeyê hat. Girtiyên li Girtîgeha Tîpa L a Kalkandere ya Rîzeyê dan zanîn ku rêveberiya girtîgehê televîzyon, sarinc û pirtûkên wan desteser kirine.&nbsp;

	&nbsp;

	Têkildarî binpêkirinên li girtîgehê, ji girtiyan Veysî Esen duh li ser telefonê bi malbata xwe re hevdîtin kir û qala binpêkirinan kir. Li gorî nûçeya Rojnameya Xwebûnê, Esen da zanîn ku rêveberiya girtîgehê ev zêdetirî hefteyeke qawîşên girtiyan diguherîne û dest danî ser televîzyon, sarinc û pirtûkan ku wan bi xwe dabûn girtiyan.&nbsp;

	&nbsp;

	DEST DANÎN SER PIRTÛKÊN GIRTIYAN

	&nbsp;

	Bi domdarî Esen anî ziman ku li qawişan 21 kes dimînin lê tevî vê yekê jî rêveberiya girtîgehê televîzyonek û sarincekî besî wan dibîne û ev agahî parve kirin: “Rêveberiya girtîgehê beriya niha televîzyon û sarinc dabûn me lê ev dîsa desteser kirin. Her wiha Hemû pirtûkên dabûn me jî desteser kirin. Her girtiyek tenê dikare 5 pirtûkan li cem xwe bihêle. Her wiha rêveberiya girtîgehê ji me re got ku ji malbatên xwe re bibêjin ku pirtûkan neşînin û heke hewce bike ew dê bidin.”

	&nbsp;

	Esen, ji malbata xwe xwest ku saziyên têkildar biçin serdana girtîgehê û binpêkirinên li girtîgehê di cih de bişopînin.&nbsp;

	&nbsp;