
Li Girtîgeha Amedê 3 girtî hatin sirgûnkirin 

2022-11-13 08:59:01


	AMED - Li Girtîgeha Hejmar 1 a bi Ewlekariya Bilind a Amedê 3 girtî hatin sirgûnkirin.

	Binpêkirinên li girtîgehên bakurê Kurdistanê û Tirkiyeyê yên li dijî girtiyan bênavber didomin. Hat zanîn ku di 10’ê mijdarê de li Girtîgeha Hejmar 1 a bi Ewlekariya Bilind a Amedê 3 girtî hatine sirgûnkirin. Hat ragihandin ku girtî bi awayekî keyfî hatine sirgûnkirin û ji bo sirgûnkirinê tu sedem nehatine destnîşankirin. Di vê çarçoveyê de ji girtiyan Ferhat Onkol sirgûnî Girtîgeha Kurkçuler a Edeneyê, Omer Ezer sirgûnî Girtîgeha Ereglî ya Konyayê û girtiyê bi navê Mahmût Kahraman jî nehat zanîn bê ka li kîja girtîgehê hatiye sirgûnkirin.&nbsp;

	&nbsp;

	Hat zanîn ku di dema sirgûnkirinê de rêveberiya girtîgehê nehişt ku girtî tiştên xwe bi xwe re bibin û niha di hucreyên yekkesî de tên ragirtin.

	&nbsp;

	Hêjayî bibîrxistinê ye ku girtiyên hatine sirgûnkirin, demek berê ji bo protestokirina bikaranîna çekên kîmyewî ji hêla Tirkiyeyê ve li dijî herêmên Zap, Metîna û Avaşînê ketibûn greva birçîbûnê ya ji bo 2 rojan.&nbsp;

	&nbsp;