Raportorê PE'yê yê Tirkiyeyê Sanchez-Amor jî bertek nîşanî binçavkirina rojnamevanan da 

2022-10-25 18:27:27


	 

	 

	NAVENDA NÛÇEYAN - Raportorê Parlementoya Ewropayê yê Tirkiyeyê Nacho Sanchez-Amor ku bertek nîşanî binçavkirina 12 rojnamevanan da, got: "Ev nîşan dide ku li Tirkiyeyê azadiyên bingehîn, bi taybetî jî azadiya çapemeniyê û fikr û ramanê hîn bêtir ber bi xerabiyê ve diçe."

	 

	Îro danê sibehê di çarçoveya lêpirsîna Serdozgeriya Komarê ya Enqereyê de polîsan li 9 bajaran bi ser malên rojnamevanên kurd ên xebatkarên Ajansa Mezopotamya (MA) û JinNewsê de girtin. Nûçegihanên MA’yê Dîren Yûrtsever, Denîz Nazlim, Selman Guzelyuz, Zemo Aggoz, Bêrîvan Altan, Hakan Yalçin, Emrullah Acar û Ceylan Şahînlî û nûçegihanên JinNewsê Habîbe Eren û Oznûr Deger û Derya Ren (di çarçoveya lêpirsîneke din de) hatin binçavkirin. 

	 

	Raportorê Parlementoya Ewropayê (PE) yê Tirkiyeyê Nacho Sanchez-Amor têkildarî binçavkirina rojnamevanan ji euronewsê (tirkî) re axivî. Sanchez Amor wiha got: "Ev nîşan dide ku li Tirkiyeyê azadiyên bingehîn, bi taybetî jî azadiya çapemeniyê û fikr û ramanê hîn bêtir ber bi xerabiyê ve diçe. Hê nediyar e ku bê ka ev binçavkirin û zext di çarçoveya 'qanûna dezenformasyonê' de pêk hatine yan na. Ger wisa be, ev yek dê metirsiyên ku Meclîsa Parlementeran a Konseya Ewropayê û gelek kesên di Parlementoya Ewropayê de bilêv kirine, piştrast bike."