
Ji bo Jîna Mahsa Amînî li Îranê 24 bajar rabûn ser pêyan

2022-09-21 11:15:52


	&nbsp;

	ENQERE - Rêxistina Mafên Mirovan Hengawê ragihand ku ji bo protestokirina qetilkirina Jîna Mahsa Amînî li 24 bajarên Îranê çalakiya grevê hatiye destpêkirin û ev agahî hatin parvekirin: “Di encama êrişên ser çalakiyan de 3 kes hatin qetilkirin, 221 kes birîndar bûn û 250 welatiyên kurd jî hatine revandin.” &nbsp;

	&nbsp;

	Rêxistina Mafên Mirovan Hengaw ku li Îranê xebatên xwe dike, têkildarî qetilkirina jina ciwan a kurd Jîna Mahsa Amînî ku ji hêla ‘polîsên exlaqê’ yên rejîma Îranê ve hatibû qetilkirin agahiyên nû parve kirin. Hengaw’ê da zanîn ku di grev û çalakiyên 19’ê îlonê de herî kêm 3 welatî ji hêla polîsên rejîmê ve hatin qetilkirin, 221 welatî birîndar bûn û zêdetirî 250 kurd jî ji hêla rejîma Îranê ve hatine revandin. Li gorî Hengaw’ê; greva ku di 19’ê îlonê roja duşemê de li bajarên kurdan dest pê kir niha li 24 bajarên din berbelav bû û li 13 bajarên din jî çalakiyên girseyî dest pê kirin.&nbsp;

	&nbsp;

	Li gorî agahiyên ku Hengawê parve kirine; greva giştî li bajarên weke Îlam, Abdanan, Malekshahi, Kirmanşah, Ravansar, Javanrud, Paveh, Kamiyaran, Sanandaj, Dehgolan, Qorveh, Marivan, Seqiz, Baneh, Divandare, Bijar, Piranşar, Sardasht, Mahabad, Bukan, Tekab, Ûrmiye, Oshnavyeh û Quturê bibandor bû. Hat ragihandin ku tevî gefên hêzên rejîmê jî welatiyan di biryara xwe de biisrar bûn û dev ji biryara giştî bernedan. Ji bilî saziyan, gelemperiya welatiyan di malên xwe de man û piştgirî dan biryara grevê. &nbsp;

	&nbsp;

	KUŞTÎ Û BIRÎNDAR

	&nbsp;

	Li 13 bajaran jî çalakiyên girseyî hatin lidarxistin. Li bajarên rojhilatê Kurdistanê yên Dîvandare, Seqiz, Baneh, Merîwan, Sanandaj, Kamiyaran, Dehgolan, Bijar, Qorveh, Tekab, Mahabad, Serdeşt û Bûkanê gel daket kolanan. Di encama gulebaran apolîsan de 3 welatiyan jiyana xwe ji dest dan û 221 welatî jî birîndar bûn. Hat zanîn ku welatiyê bi navê Mohsen Mohammadî li bajarê Dîvandareyê, Reza Lotfî yê 25 salî li Dehgolanê û Fereydoun Mahmoudî jî di çalakiyên li bajarê Seqizê de hatin qetilkirin. &nbsp;

	&nbsp;

	Hengawê têkildarî kuştî û birîndaran de ev agahî parve kirin: “Li bajarê Dîvandereyê kesek hat kuştin û 4 jê ciwan bi giştî 33 kes birîndar bûn. Li bajarê Seqizê kesek hat qetilkirin û 16 jê jin, 4 jê zarok bi giştî 37 kes birîndar bûn. Li bajarê Bangehê 10 jê jin û 6 jê zarok bi giştî 40 kes birîndar bûn. Li bajarê Mahabadê 8 jê jin û 7 jê ciwan û zarok bi giştî 23 kes birîndar bûn. Li Bûkanê 4 jê jin û 3 jê ciwan bi giştî 17 kes birîndar bûn. Li bajarê Sanandajê 6 jê jin bi giştî 14 kes birîndar bûn. Li Mêrîwanê 5 kes birîndar bûn. Li bajarê Dehglanê kesek hat kuştin û 16 kes birîndar bûn. Li bajarê Bijar û Grup’ê 9 kes birîndar bûn. Li bajarê Kamiryanê 11 kes birîndar bûn. Li Tekabê 3 jê jin bi giştî 7 kes birîndar bûn.” Hat destnîşankirin ku rewşa hinek welatiyên birîndar giran e.&nbsp;

	&nbsp;

	ZÊDETIRÎ 250 KURD HATIN REVANDIN&nbsp;

	&nbsp;

	Li bajarên navborî yên çalakî lê hatine lidarxistin herî kêm 250 welatiyên kurd ji hêla hêzên ewlekariyê yên rejîma Îranê ve hatin revandin û nasnameya 30 welatiyan ji hêla Hengawê ve hatin piştrastkirin. &nbsp;

	&nbsp;

	Hengawê da zanîn ku dê deng û dîmenên çalakiyan ji hêla komên hiqûqê ve bên lêkolînkirin û piştre jî têkildarî mijarê bi gel û çapemeniyê re agahiyan parve bikin.&nbsp;

	&nbsp;