Bavê Bûldanê hat definkirin 

2022-07-10 19:33:37


	 

	STENBOL- Bavê Hevseroka Giştî ya HDP’ê Pervîn Buldan Halîs Yuzer bi merasîmeke girseyî hat veşartin. 

	 

	Halîs Yuzer, bavê Hevseroka Giştî ya Partiya Demokratîk a Gelan (HDP) Pervîn Bûldan ku ji ber qeyrana dil jiyana xwe ji dest dabû, hat definkirin. Ji bo Yuzer li Mizgefta Yayla Miraç a Bahçelîevlerê merasîmeke girseyî hat lidarxistin. Tevî ferdên malbatê, Hevserokê Giştî yê HDP'ê Mîthat Sancar, Hevseroka Partiya Herêmên Demokratîk (DBP) Salîha Aydenîz, Hevserokê Partiya Sosyalîst a Bindestan (ESP) Şahîn Tumuklu, parlamenterên CHP'ê yên Stenbolê Tûran Aydogan û Akîf Hamza Çelebî, Seroka CHP'ê ya Stenbolê Canan Kaftancioglu, parlementerên HDP'ê, rêveberên HDP'ê yên bajar û navçeyan, Hevseroka Partiya Çep a Kesk (YSP) Ayşe Erdem, Partiya Deva, Komeleya Alîkarî û Piştevaniyê ya Alimên Olî (DIAYDER), Başak Demîrtaş, lîstikvan Ganî Ruzgar Şavata û gelek kes tev li merasîmê bûn.  

	 

	Serokê Şaredariya Bajarê Mezin a Stenbolê Ekrem Îmamoglu û gelek nûnerên partiyên siyasî û şaredaran çeleng şandin merasîmê.

	 

	Piştî wecîbeyên dînî Yuzer li Goristana Osmaniye ya Bakirkoyê bi duayan hat definkirin.

	 

	Piştî definkirinê Buldan sersaxî qebûl kirin. Şîn dê li Komeleya Yeşîl Xursê ya li Bahçelîevlerê bê danîn.