
Xizmên girtiyan bi dirûşman meşiyan   

2022-04-28 16:02:00


	&nbsp;

	NAVENDA NÛÇEYAN - Malbatên girtiyan çalakiya xwe ya Nobeta Edaletê îro jî li Stenbol û Wanê berdewam kirin. Malbatên girtiyan, li Stenbolê bi dirûşman meşiyan û diyar kirin ku dê di Cejna Remezanê de biçin girtîgehan.&nbsp;

	&nbsp;

	Bi mebesta berdana girtiyên ku cezayê wan xelas bûyî lê nayên berdan û girtiyên nexweş, malbatên girtiyan li Stenbol û Wanê dest bi çalakiya Nobeta Edaletê kiribûn. Çalakiya malbatan îro jî bedewam kir. Malbatên girtiyan da zanîn ku dê di Cejna Remezanê de çalakiya xwe li pêşiya girtîgehan bidomînin û daxwaza edaletê bikin.&nbsp;

	&nbsp;

	Çalakiya malbatên girtiyan a Stenbolê kete hefteya 6’emîn û malbatan çalakiya xwe ya li pêşiya Edliyeya Stenbolê li dar xistin. Di çalakiya vê hefteyê de parlamenterê Partiya Demokratîk a Gelan (HDP) ê Stenbolê Alî Kenanoglu, Dayikên Aştiyê û malbatên girtiyan amade bûn.&nbsp;

	&nbsp;

	ÇALAKIYA BÊDENG

	&nbsp;

	Polîsan bi hinceta biryara qedexeya çalakiyan a Qeymeqamtiya Kagithaneyê xwestin çalakiya malbatan asteng bikin. Li ser israra malbatan jî polîsan gefa binçavkirinê xwarin. Malbatan li dijî van gefan, “Çalakiya bêdeng” li dar xistin.&nbsp;

	&nbsp;

	Parlamenter Alî Kenanoglu bertek nîşanî astengkirinên polîsan da û wiha got: “Polîs dibêjin ku dê dayikên li vir binçav bikin. Derfetê nadin ku xelk bertekên xwe yên demokratîk nîşan bidin. Girtîgeh veguherîne îşkencexaneyan. Bi piştgirî û parastina dewlet û desthilatdariyê îro li girtîgehan bi awayekî vekirî îşkence tê kirin. Destdirêjî tên kirin û girtiyan neçarî xwekuştinê dikin. Sepana îdamê li girtîgehan di meriyetê de ye. Dayik, xwedî li zarok û malbatên xwe derdikevin û dixwazin ku darazeke adilane hebe. Dixwazin ku dewlet li gorî qanûnên xwe tevbigere. Lê tehemûla vê nakin. “&nbsp;

	&nbsp;

	BI DIRÛŞMAN MEŞIYAN

	&nbsp;

	Piştî axaftina Kenanoglu jî malbatên girtiyan mil dan milên hev û bi tililî û dirûşma “Bijî berxwdana zindanan” ji pêşiya edliyeyeyê meşiyan û çalakiya xwe bi dawî kirin.&nbsp;

	&nbsp;&nbsp;

	LI WANÊ BERTEK NÎŞANÎ POLÎSAN DAN

	&nbsp;

	Çalakiya Nobeta Edaletê ya Wanê jî li pêşiya edliyeyê hate kirin. Li gel parlamentera HDP’ê ya Wanê Muazzez Orhan û endamên Komeleya Piştgirî û Piştevaniya bi Malbatên Girtî û Hikûmxwaran re (TUHAY-DER), endam û rêveberên gelek saziyên din jî piştgirî dan çalakiyê. Lê polîsan destûr nedan ku malbat daxuyaniyê bidin. Polîsan, pêşî li malbatên ku ber bi deriyê edliyeyê ve diçûn girtin û gotin ku dê destûra daxuyaniyê nedin. Girse, ji hêla polîsan ve hate dorpêçkirin û çalakvanan jî bertek nîşanî vê sepana polîsan dan.&nbsp;

	&nbsp;

	‘EM JI BO EDALETÊ LI VÊ DERÊ NE’

	&nbsp;

	Dayika Botan Tîmûr, Aslihan Tîmûr bertek nîşanî helwesta polîsan da û wiha got: “Em tenê ji bo edaletê li vê derê ne. Tekane derdê me ew e ku Wezareta Edaletê dengê me bibihîze. Heke nexwazin em Nobeta Edaletê li dar bixin, wê demê bila zarokê me berdin da ku em jî li malên xwe vegerin.”&nbsp;

	&nbsp;

	Malbatan bi çepikan astengkirina polîsan protestor kir û çalakiya xwe bi dawî kirin.&nbsp;

	&nbsp;