Halê sûrên dîrokî yên ku tên restorekirin! 

2022-04-09 09:15:34


	AMED - Sûrên dîrokî yên Amedê ku qeyûm gotibû "em restore dikin" û ji çopan xalî nabin, hê jî yek ji wargehên tiryakkêşan in.

	 

	Xebatên "restorekirina" sûrên dîrokî yên Amedê didomin, lê nediyar e ku dê restorasyon kengî biqede. 

	 

	HALÊ SÛRAN

	 

	Heya niha tenê qismek biçûk ên sûrên ku her sal bi hezaran kes serdana wan dikin, hatine restorekirin û yên mayî jî di halê xwe de hatine hiştin. Deverên ku di halê xwe de hatine hiştin, ji çopên turîstên xwecihî û biyanî xalî nabin. Bi taybetî jî hundurê sûran bûne sergo. Her wiha  ji ber terx û pîsîtiya mirovan jî bêhneke nexweş ji wan tê. 

	 

	Ji xeynî vê qirêjiyê, gelek deverên sûran hê jî wargehên tiryakkêşan e. Ji ber agirê ku tiryakkêş vêdixin kevirên sûran reş bûne.