
Malbatên girtiyên di greva birçîbûnê de ne: Bila daxwazên zarokên bi cih bînin  

2022-02-25 14:08:08


	&nbsp;

	TEKÎRDAG - Malbatên girtiyan li ber Girtîgeha Tekîrdagê daxuyanî dan û gotin: "Em bang li raya giştî dikin ku li hemberî greva birçîbûnê ya bêdawî û bêdorveger a ku 40 roj in dewam dike û li hemberî pirsgirêkên girtiyan bi hestiyar bin."

	&nbsp;

	Girtîyên li Girtîgeha Tekîrdagê ya Tîpa F’yê 40 roj in li dijî zext û êrişên li ser xwe û binpêkirina mafên xwe ketine greva birçîbûnê. Malbatên girtiyan ji bo daxwazên zarokên wan werin qebûlkirin, li ber girtîgehê civiyan û daxuyanî dan çapemeniyê. Malbatên girtiyan ji bajarên wek Amed, Êlih û Sêrtê jî ku hatine hevdîtina zarokên xwe beşdarî daxuyaniyê bûn. Parêzerên endamên Komeleya Hiqûqnasên Ji Bo Azadiya (OHD) jî piştgirî dan malbatên girtiyan.&nbsp;

	&nbsp;

	‘MAFÊN WAN TÊ BINPÊKIRIN’

	&nbsp;

	Birayê girtî Mehmet Suleyman Ucakan, Rûtbettîn Ucakan di daxuyaniyê de axivi û destnîşan kir ku li Girtîgeha Tekîrdagê ya Jimara 2'yan a Tîpa F’yê di 17’ê meha çile de dest pê kiriye heya niha didome û 12 girtî di çalakiyê de ne. Ucakan anî ziman ku girtiyên wan li dijî binpêkirinên mafan, tecrîdê û zextan di greva birçîbûnê bêdawî û bêdorveger de ne û got: “Tecrîda ku li ser girtiyan her roj girantir dibe û bi hinceta pandemiyê vê tecrîdê girantir dikin. Bi taybetî mafên girtiyan ên rojane tên astengkirin. Îşkence û muameleya xerab li girtiyan tê kirin. Hemû mafên wan tên binpêkirin.”&nbsp;

	&nbsp;

	‘MÛXATAB TUNE NE’&nbsp;

	&nbsp;

	Ucakan di bal kişand ser mirina bi guman a Vedat Erkmen ê li wê girtîgehê jiyana xwe ji dest da û got: “Ji ber zêdebûna tundiya derûnî û fizîkî, îşkencekirinê, ewlehiya girtiyan tune ye. Girtî ji ber ku muxatebek ji bo binpêkirinên mafê xwe nabîne. Girtî ne bi nivîskî û ne jî bi devkî dikarin serlêdanê bikin. Berpirsiyar ango midûrê girtîgehê bi girtiyan re hevdîtin nake. Ji ber vê yekê girtî di greva birçîbûnê de ne.”&nbsp;

	&nbsp;

	DAXWAZÊN GIRTIYAN

	&nbsp;

	Ucakan di daxuyaniyê da daxwazên girtiyan wiha rêz kir: “Bila zextên fizîkî û derûnî, îşkence û muameleya xerab were bidawîkirin. Bila cihê bêhnvedanê serbest be û hucre werin rakirin. Divê guhertina odeyan were sekinandin û li gorî daxwaza girtî pêk were. Divê lêgerîna tazî, lêgerînên keyfî bi dawî bibin û bila girtî li gorî daxwaza xwe beşdarî faleyetên sosyal û sporê bibin. Bila pirtûk, rojname, kovar, name û kargoyên girtiyan bidin wan. Bila dawî li tecrîdê bê û binpêkirinên mafan ên bi hêceta pandemiyê werin bidawîkirin. Bila muxatab ji daxwazên girtiyan re hebin.”&nbsp;

	&nbsp;

	‘DIVÊ CIHÊKARÎ NEYÊ KIRIN’&nbsp;

	&nbsp;

	Ucakan di dewama daxuyaniyê de wiha got: “Girtî di hemû daxwazên xwe de mafdar in. Bila daxwazên wan li gorî qanûnên hundirîn û peymanên navneteweyî werin bicihaanîn. Divê dewlet û hemû saziyên xwe cihêkariyê nekin û bi wekhevî daxwazên girtiyan bicih bînin. Girtiyan bi rêya malbat, parêzer, parlamenter û saziyan serî li saziyên dewletê dane lê hemû bêbersiv hatine hiştin.”

	&nbsp;

	BANGÎ RAYA GIŞTÎ KIR

	&nbsp;

	Ucakan destnîşan kir ku berpirsiyarê binpêkirinên mafan Midûriyeta Girtîgeha Tekîrdaghê û Wezareta Dadê ye û vê bangê kir: “Em dixwazin wezaret û mûdiriyet wezîfeya xwe bînin cih. Em bang li raya giştî dikin ku li hemberî greva birçîbûnê ya bêdawî û bêdorveger a ku 40 roj in dewam dike û li hemberî pirsgirêkên girtî pê re rûbirû mane bi hestiyar tevbigere.”&nbsp;

	&nbsp;

	Daxûyanî bi berzkirina dirûşmeyan bi dawî bû. Pişt re parêzerên endamên OHD’ê Vedat Ece û Eda Onal çûn girtîgehê bi îdareya girtîgehê û girtiyan re hevdîtin kirin.&nbsp;

	&nbsp;

	&nbsp;