Serdana malbata hevxemên xwe kirin  

2022-02-18 15:12:07


	 

	RIHA - Malbatên ku zarokên wan di qetlîama Pirsûsê de jiyana xwe ji dest dan, serdana Malbata Şenyaşar ku hevxemên wan e, kirin. 

	 

	Nobeda Edaletê ya Emîne Şenyaşar û kurê wê Ferît (Malbata Şenyaşar) a li ber Edliyeya Rihayê di roja 347’emîn de berdewam dike. Malbatên ku zarokên wan di qetlîama Pirsûsê de jiyana xwe ji dest dane û ji bo dozê li Rihayê bûn, serdana Malbata Şenyaşar kirin. Malbata Şenyaşar, malbatên Pirsûsê ku ew jî bi salan e edaletê dixwazin pêşwazî kirin. 

	 

	Di serdanê de Fethî Aydin ê bavê Çagdaş Aydin ku di qetlîamê de jiyana xwe ji dest da axivî û got ew piştigiriya têkoşîna malbatê dikin û wê her tim li cem nobeda wan birûmet cih bigirin. Aydin da zanîn ku xema wan û malbata Şenyaşar yek e, ew wek malbatên Pirsûsê ji malbata Şenyaşar û ji bo doza xwe edaletê dixwazin. 

	 

	Ferît Şenyaşar jî axivî û anî ziman ku sedema krîzên li Tirkiyê bêedaletiye û ew ji bo malbata xwe, ji bo malbatên Pirsûsê û her kesî re edaletê dixwaze. 

	 

	Malbatê Pirsûsê kêliyek li gel Ferît Şenyaşar nobed girtin û pişt re ji bo şopandina doza qetlîama Pirsûsê derbasî eywana dadgehê bûn.