
Di cejna êzdiyan de 4 saetan bombe li Şengalê barandin

2022-02-02 12:22:54


	&nbsp;

	NAVENDA NÛÇEYAN – Tirkiyeyê şevê din bi awayekî hemwext êrişî Şengal, Mexmûr û Dêrikê kir. Îro Cejna Çileya Zivistanê ya Êzdiyan bû û Tirkiyeyê şevê din zêdetirî 4 saetan Şengal bombebaran kir.&nbsp;

	&nbsp;

	Hêzên artêşa Tirkiyeyê şevê din bi awayekî hemwext Wargeha Penaberan a Mexmûrê, Şengal û Dêrik a Bakur û Rojhilatê Sûriyeyê bombebaran kir. Li gorî agahiyan, balafirên Tirkiyeyê zêdetirî 4 saet û nîvan bênavber bombe li Şengalê barandin. Tê payîn ku gelê Şengalê li Xanesorê kom bibe û YBŞ têkildarî êrişê daxuyaniyeke nivîskî bide.&nbsp;

	&nbsp;

	GELEK DEVER HEDEF HATIN GIRTIN

	&nbsp;

	Êrişa li dijî Şengalê şevê din saet di 22.00’an de dest pê kir û heta derengiya şevê jî bênavber domiya. Di êrişê de Çiyayê Şengalê û quntara çiyê, Mîna Amûd, Çilmêran, Geliyê Kersê, Bora, Kora Simoqiyan û xeteke dirêj a Bakurê Çiyayê Şengalê jî hedef hatin girtin. Balafirên artêşa tirk her wiha noqteyeke mûşterek a Xanesorê ku Foca 80’ê ya hêzên Heşdî Şebî lê dimînin jî bombebaran kir.

	&nbsp;

	Heta niha jî nayê zanîn bê ka çend balafirên şer û balafirên bêmirov di êrişê de hatine bikaranîn. Tê gotin ku Fermandariya Giştî ya YBŞ/YJŞ’ê dê têkildarî encamên êrişê di demên pêş de daxuyaniyeke nivîskî bide.&nbsp;

	&nbsp;

	DI CEJNÊ DE ÊZDÎ HEDEF GIRTIN

	&nbsp;

	Weke ku tê zanîn îro Cejna Çileya Zivistanê ya Civaka Êzdî ye û xelkê êzdî ji duh ve dest bi &nbsp;amadekariyan kiribûn. Balkêşe ku hemû êrişên Tirkiyeyê yên di demên dawî de, di rojên ji bo civaka êzdî pîroz de tên kirin.&nbsp;

	&nbsp;

	HEVDÎTINA KAZIMÎ Û SEFÎRÊ TIRK

	&nbsp;

	Hêjayî bibîrxistinê ye ku Serokwezîrê Iraqê Mistefa Kazimî bi sedema êrişa DAIŞ’ê ya li dijî Hesekê û hewldana revandina DAIŞ’iyên di girtîgehê de, çûbû ser sînorê di navbera Şengal û rojavayê Kurdistanê. Kazimî her wiha di dema vegerê de bi Sefîrê Tirk Alî Riza Gûney re civiya bû. Lê derheqê naverok û sedema hevdîtinê de tu agahî nehatibûn parvekirin.&nbsp;

	&nbsp;

	ÊRIŞ PIŞTÎ CIVÎNA PKK’Ê PÊK HAT

	&nbsp;

	Weke ku tê zanîn êrişa DAIŞ’ê ya li dijî Hesekê têk çûbû û gelek kes vê êrişa Tirkiyeyê wek hewldana tolhildana DAIŞ’ê dinirxîne. Di heman demê de Komîteya Navendî ya PKK’ê duh bi daxuyaniyekê ragihand ku bi beşdariya hemû endamên komîteyê û rêveberiya partiyê civîna salane lidarxistine û plansaziya têkoşînê ya sala nû derxistine. Balkêşe ku êrişa Tirkiyeyê piştî daxuyaniyê hat çêbû.&nbsp;

	&nbsp;

	Meclisa Gel a Şengalê jî ji bo şermezarkirina êrişan bang li gel kir û tê payîn ku dê di saet 11.00’ê de li noqteya muşterek a Xanesorê daxuyanî bê dayîn.&nbsp;

	&nbsp;