Malbat ji bo biçin Îmraliyê serî li dozgerî û girtîgehê dan 2021-10-01 12:55:40   STENBOL - Malbat û wasiyê Rêberên PKK'ê Abdullah Ocalan û malbatên girtiyên din ji bo hevdîtinê serî li Serdozgeriya Komarê ya Bûrsayê û Miduriyeta Girtîgehê dan    Birayê Rêberê PKK’ê Abdullah Ocalan ê 22 sal in li Girtîgeha Tîpa F a Ewlehiya Bilind a Îmraliyê di bin tecrîdeke giran de ye, Mehmet Ocalan û wasiyê wî Mazlûm Dînç û birayê girtî Omer Hayrî Konar, Alî Konar, birayê Hamîlî Yildirim, Polat Yildirim û xwişka Veysî Aktaş, Melîhe Çetîn bi rêya parêzeran ji bo roja Duşemê hevdîtinê bikin, serî li Serdozgeriya Komarê ya Bûrsayê dan.    SERÎ LI ÎDAREYA GIRTÎGEHÊ JÎ DAN    Malbatan, bi rêya Serdozgeriya Komarê ya Bûrsayê serî li Miduriyeta Girtîgeha Îmraliyê ya Tîpa F a Ewlehiya Bilind jî dan.    NE ERÊNÎ NE NEYÎNÎ BERSIV NADIN   Di 23’yê Îlona 2020'an de, bi hinceta “Nexşerêya" Ocalan ku di sala 2009’an de weke pêveka parastina xwe ji Dadgeha Mafê Mirovan a Ewropayê (DMME) re şand, ji bo 6 mehan biryara qedexeya parêzeran dabûn Ocalan û 3 girtiyên gel wî. Ligel ku qedexeya hevdîtinê di 23’yê Adarê de qediya jî, ji serlêdanên parêzeran re ne erênî ne neyînî bersiv nayê dayîn. Dîsa bi serlêdana parêzeran a di Çileya 2021'an re, derketibû holê ku cezayek dîsîplînê yê nû dane Ocalan. Ji parêzerên Ocalan Rezan Sarica û Newroz Ûysal, piştî 8 salan di 2-22’ê Gulan, 12-18’ê Hezîran û 7’ Tebaxa 2019’an de hevdîtin bi muwekîlên xwe re kiribûn.   HEVDÎTIN DI NÎVÎ DE BIRÎ BÛN    Herî dawî ji ber îdiayên li ser hesabên medya civakî yên derbarê Ocalan de fikarên raya giştî mezin bûbûn û di 25’ê Adarê de birayê Ocalan Mehmet Ocalan pê re bi telefonê axivî bû. Lê Mehmet Ocalan ragihandibû ku hevdîtina telefonê di nivî de hatiye birîn. Ocalan ku 22 sal in li Girtîgeha Îmraliyê ya Ewlehiya Bilind a Tîpa F di bin tecrîdeke girankirî de girtî ye cara ewil di 27’ê Nîsana 2020’an bi telefonê bi birayê xwe Mehmet Ocalan re axivîbû.