
Jinên Şirnexî bang li jinên cîhanê kirin: Li cem Emîne Şenyaşarê bin 

2021-09-08 15:45:45


	RIHA - Jinên Şirnexî yên serdana Emîne Şenyaşar kirin, bang li jinên cîhanê kirin ku li cem Emîne Şenyaşarê bin.

	&nbsp;

	Çalakiya “Nobeta Edaletê” ya malbata Şenyaşar a li pêş Edliyeya Rihayê di roja 184’emîn de didome. Serdanên piştevaniyê yên çalakiya nobetê jî berdewam dikin. Endamên Înîsiyatîfa Dayikên Aştiyê ya Şirnexê, aktivîstên Tevgera Jinên Azad (TJA) û rêxistinên Partiya Demokratîk a Gelan (HDP) ên navend û navçeyên Şirnexê serdana malbata Şenyaşar kirin. Malbatê şande bi dowîzên “Bila edalet were zilm bi dawî bibe” û “Em edaletê dixwazin” pêşwazî kirin.&nbsp;

	&nbsp;

	Jinên ku serpêhatiyên Emîne Şenyaşar a hevjîn û du kurên wê hatin qetilkirin guhdar kirin hestiyar bûn. Emîne Şenyaşar a demeke dirêj bi girî û lorandinê serpêhatiyên xwe vegotin, bertek nîşanî polîsên sivîl ên ew bi kamerayê dikişandin da û wiha got: “Hûn her roj me li vir bi kamerayan dikişînin. We çi dît? Herin kesên komkujî kirine bibînin.”

	&nbsp;

	ERDOGAN EMÎNE ŞENYAŞARÊ NABÎNE?

	&nbsp;

	Şandeya demekê bi malbatê re çalakiya rûniştinê kir, piştî serdanê daxuyanî da. Di daxuyaniyê de Dayika Aştiyê Emîne Akiş axivî û wiha got: “Dayika Emîne rexmî germa havînê jî 6 mehan zêdetir e ji bo edaletê li vir rûdine. Em jî daxwaza edaletê dikin. Divê demildest ji bo dayika Emîne Şenyaşar û hemû dayikan pêk were. Em jî daxwaza edaletê dikin. Heke edalet were wê aştî jî were. Divê hemû jinên cîhanê xwedî li Emîne Şenyaşar derkevin. Emîne Erdogan jî jinek e û dayik e. Emîne Erdogan, Emîne Şenyaşar a 6 meh in li vir rûdine nabîne?”

	&nbsp;

	‘BES BÊJIN EM XWIŞK Û BIRA NE Û BIKUJIN’

	&nbsp;

	Dayika Aştiyê Nûriye Adiş jî wiha got: “Gelek neheqî li dayika Emîne hat kirin û hêj jî tê kirin. Mînakekî din ê vê zilmê nîne. Em li edaletê digerin, dayika Emîne 6 meh in li vir e lê rayedarekî dewletê jî wê nabîne. Tundiyê lê dikin. Dibêjin ‘xwişk û birayên me yên kurd’ ka xwişk û biratî li ku ma. Bes bêjin em ‘xwişk û bira ne’ û bikujin.”

	&nbsp;

	Dayika Aştiyê Hatîce Betul jî diyar kir ku jin aştî û edaletê dixwazin û wiha got: “Divê hemû jin û dayik li vir bin û dayikê tenê nehêlin. Heke li dayikê xwedî dernekevin, dema edaletê ji bo wan jî pêwist kir wê demê kesê li cem xwe nabînin.”

	&nbsp;

	Dayika Aştiyê Nebîha Akay jî wiha got: “Dayika Emîne ji bo bi zarokên xwe re jiyaneke xweş bijî ew mezinkirin ne ji bo hin kes ji bo berjewendiyên xwe wan bikujin.”

	&nbsp;

	Axaftin bi berzkirina dirûşmeya “Heq hiqûq edalet” bi dawî bûn.&nbsp;

	&nbsp;

	Şande piştî axaftinan ji bo tevlî şîna dayika Berdevka Demê ya TJA’yê Ayşe Gokkan, Lutfiye Gokkan bibin ber bi Gundê Kulunçe yê navçeya Pirsûsa Rihayê ve ketin rê.&nbsp;

	&nbsp;

	&nbsp;