
‘Hişkayî cidî ye, divê hikumet piştevaniya cotkaran bike’ 

2021-05-28 15:45:44


	AMED - Şaxên Tarim Orkam Senê û Odeyên Endezyarên Zîraatê û Komeleya Ekolojiyê ya Mezopotamyayê diyar kirin ku rewşa hişkesaliyê li bajarên herêmê cidî ye û xwest hikumet dest ji polîtîkayên şaş ên çandiniyê û avê berde û li tavilê piştevaniya cotkaran bike.&nbsp;

	&nbsp;

	Sendîkaya Kedkarên Giştî ya Milê Xizmeta Çandinî, Daristan, Hawirdor û Hewayê (Tarim Orkam-Sen) ên Şaxên Amed, Mêrdîn û Rihayê, Odeya Endezyarên Zîraatê ya Şaxa Amedê û Komeleya Ekolojiyê ya Amedê têkildarî hişkesaliyê û bandora wê ya li ser cotkaran û çandiniyê li gundê Qozanê ya bi ser navçeya Sûra Amedê ve daxuyanî dan çapemeniyê.&nbsp;

	&nbsp;

	'EV HIŞKESALÎ WÊ BANDOR LI XELKÊ JÎ BIKE’&nbsp;

	&nbsp;

	Serokê Odeya Endezyarên Zîraatê ya Şaxa Amedê Abdussamed Ucaman diyar kir ku li herêmê hişkesaliyek cidî qewimiye û ev yek tenê ne biguhertina avhewayê pêk hatiye di heman demê de ji ber zêdebûna hejmara bendavan ekosîstemê guhertiye. Ucaman anî ziman ku divê têkildarî ziwayiyê cotkar werin hişyarkirin û heke rayedar vê yekê piştguh bikin wê bandorek neyînî li ser nîsk, ceh û geniman bike û ev yek wê bandora xwe li ser sofreyan jî nîşan bide.&nbsp;

	&nbsp;

	‘DIVÊ HIKUMET DEST JI POLÎTÎKAYÊN ŞAŞ BERDE’&nbsp;

	&nbsp;

	Pişt re Serokê Tarim Orkam-Senê yê Amedê Nasir Demîrkiran metna daxuyaniyê xwend û destnîşan kir ku ji ber hişkesaliyê gengaz e ku bobelat pêk werin û ji ber nebarîna şiliyê ji sedî 80’ê genim, ceh, nîsk û nebatên din zirarê dîtine, kêm bûne û telafiya wê nebe. Demîrkiran anî ziman ku heke zirara heyî neyê tazmînkirin dibe ku di demsala pêşiya me de cotkar nikaribin hilberînê ango çandiniyê bikin û dibe ku hişkesaliya heyî rê li ber xelayê veke û heke bergirî neyên girtin dê di rehendên civakî û aborî de jî pirsgirêkên cidî biqewimin. Demîrkiran destnîşan kir ku rewşa hişkesaliyê li bajarên herêmê cidî ye û xwest hikumet dest ji polîtîkayên şaş ên çandiniyê û avê berde û hikumet li tavilê piştevaniya cotkaran bike da ku zirara wan ji holê rabe.&nbsp;

	&nbsp;

	'EM Ê BIBIN KARKERÊN DEMSALÎ’

	&nbsp;

	Pişt re Emîn Kiran ê cotkariyê dike jî destnîşan kir ku ew niha hatine asta topavêtinê û ji ber ziwayiyê dexlûdanê wan hişk bûne û ew deyndar mane. Kiran anî ziman ku heke dewlet ji zirara cotkaran re nebe alîkar wê cotkarên herêmê jî bibin karkerên demsalî û ji ber ewşa wan nebaş e niha nikarin perê avê jî bidin.&nbsp;

	&nbsp;