
Li Robarokê eskeran du kes birîndar kirin

2021-05-20 10:14:49


	COLEMÊRG - Li navçeya Robarokê, eskeran gule berdan Şehap Şendol ê şivantiyê dike û Celîl Ekîncî yê ku berê birayê wî ji aliyê eskeran ve hatibû birîndarkirin. Esker bêyî ku hişyariya “raweste” bike, her du kes birîndar kirin.&nbsp;

	&nbsp;

	Li navçeya Robarok a Colemêrgê ya dikeve sînorê Başûrê Kurdistanê, eskeran gule berdan Şahap Şendol ê 23 salî û Celîl Ekîncî yê 17 salî û birîndar kirin. Li gorî agahiyên hatin bi dest xistin, bûyer di 18’ê Gulanê de, li gundikê Çemêrkurk ê girêdayî gundê Haci Bey saet 07.20 rû da. Eskeran li ser xeta sînor gule berdan şivan Şahap Şendol ê li heywanên xwe yên windabûyî digeriya û Celîl Ekîncî yê bazirganiya cixareyan dike. Hat diyarkirin ku esker bêyî ku hişyariya “raweste” bike, her du kes birîndar kirin. Welatî û xizmên birîndaran ên hatin cihê bûyer, her du kes rakirin nexweşxaneyekê Herêma Federe ya Kurdistanê. Hat destnîşan kirin ku Şendol ê ji destê xwe birîndar bû ji nexweşxaneyê hat derxistin û dermankirina Ekîncî yê ji zikê xwe birîndar bû jî, hîna dermankirina wî dewam dike.&nbsp;

	&nbsp;

	BERÊ BIRAYÊ WÎ BIRÎNDAR KIRIBÛN

	&nbsp;

	Parlamenterê Partiya Demokratîk a Gelan (HDP) yê Colemêrgê Saît Dede, dîmenên têkildarî birîndarkirina Celal Ekîncî parve kir. Dede yê HDP’î, wiha bi van gotinan dîmen parve kirin: “Dîmen dîsa ji Robarokê ne. Eskeran li ser xeta sînor, gule berdan du ciwanên me yên sîvîl û birîndar kirin. Gelo daraz li gorî kîjan qanûnan tevdigere. Kanê mafê jiyanê!”&nbsp;

	&nbsp;

	Di heman demê de, hat hînbûn ku Celîl Ekîncî birayê Reşat Ekîncî yê di 31’ê Kanûna 2020’an de, li heman herêmê ji aliyê eskeran ve hatibû birîndarkirin e.&nbsp;

	&nbsp;

	EKÎNCÎ: ESKER NEBÛN ALÎKAR

	&nbsp;

	Birayê Ekîncî Reşat Ekîncî yê ku me derbarê bûyerê de pê re hevdîtin kir, wiha got: “Birayê min, di saetên serê sibê de, bi hespê xwe derbasî Herêma Kurdistana Federe bû. Dûre di vegerê de, şivan Şahap Şendol ê heywanên wî winda bibûn û di heman demê de dibe xizmê me, dibîne û dixwazin bi hevre derbasî Tirkiyeyê bibin. Li ser rêya di vegera gund de, ji qereqolê beyî ku tu hişyarî bê kirin, gule li wan tên reşandin. Ewil birayê min ê li ser pişta hestir ji pişta xwe ve birîndar dibe. Gule li pişta wî dikeve di singê wî re derdikeve.”

	&nbsp;

	HÎNA JÎ TE DERMAN KIRIN&nbsp;

	&nbsp;

	Ekîcî, bal kişand ser rewşa birayê xwe û şivanê birîndar bû û wiha hirsa xwe anî ziman: “Birayê min û şivan Şendol ên birîndar bûn, bi saetan li erdê dimînin. Eskerên li herêmê, bi tu awayî bi wan ve naçin. Eskeran ji bo kuştinê gule berdan birayê min û Şahab. Piştî ku xizmên me telefonê me kirin, agahiya me ji bûyerê çêbû. Em çûn herêmê. Me dît ku du hespên me kuştine. Birayê min û Şahap jî li kêleka hespan rawestiyabûn. Me birîndarên xwe, li ser pişta xwe rakirin nexweşxaneyekê Herêma Federe ya Kurdistanê. Birayê min hîna jî li wê derê tê dermankirin.”

	&nbsp;