
Ji bo Newroza Wanê bang: Em bi ruhê berxwedana Newroza 2008’an beşdar bibin 

2021-03-15 09:20:19


	WAN - Şêniyên Wanê banga beşdariya Newrozê kirin û gotin: “Em bi ruhê Newroza sala 2008’an biherikin qada Newrozê.”&nbsp;

	Yek ji dîmenên Newroza nehatiye jibîrkirin jî Newroza sala 2008’an a Wanê ye. Xelkê Wanê roja 22’yê adarê li ber avahiya DTP’ê ya wê demê ya Wanê kom bû û xwest bimeşin qada Newrozê. Walîtiyê Newroz qedexe kiribû. Polîsan xelkê dorpêç kiribû û li bajêr rewşa awarte ragihandibûn. Tevî dorpêça polîsan jî xelkê li ber avahiya DTP’ê agir pêxist û xwestin Newrozê pîroz bikin. Polîsan xwe li vê yekê ranegirt û bi tundî êrişî girseyê kirin. Tevî hemû astengî û êrişa polîsan jî xelk li kolanan agir pêxist û seranserî rojê bi coşek mezin Newroz pîrozkirin. Li gorî daneyên fermî di wê rojê de 88 kes birîndar bûn û ji 200 kesî zêdetir kes hatin binçavkirin.&nbsp;

	&nbsp;

	Dîmenên zarokê 16 salî Mehdî Kûrt ê bi êrişa polîsan re rûbirû mabû ji bîra kesî neçûye. Bi dehan polîs bi jopan li ser û çavê Kûrt didin û îşkenceyek giran lê kiribûn. Ev dîmenê vê hovîtiyê di medya navnetewî de jî belav bûbû û her kesî matmayî hiştibû.&nbsp;

	&nbsp;

	Komîteya Amadekar a Newroza Wanê biryar da ku wê Newroza îsal jî li ber Keleha Wanê pîroz bike. Şêniyên Wanê banga beşdariya Newrozê kirin.&nbsp;

	&nbsp;

	BANGA BEŞDARIYÊ KIR&nbsp;

	&nbsp;

	Hacer Bariştiran anî ziman ku ew di Newroza sala 2008’an de hatiye binçavkirin û ew her sal beşdarî pîrozbahiya Newrozê bûye û dê îsal jî bibe. Bariştiran banga beşdariya Newrozê li xelkê Wanê kir.&nbsp;

	&nbsp;

	BI RUHÊ 8’Ê ADARÊ WERIN NEWROZÊ&nbsp;

	&nbsp;

	Hevşaredara Navçeya Bêgiriyê ya Wanê Leyla Balkan a qeyûm tayînî şûna wê hatiye kirin jî banga beşdariya Newrozê li xelkê Wanê kir û destnîşan kir ku Newroz xwedî girîngiyek dîrokî ye û xwest jinên Wanê bi ruhê 8’3e Adarê biherikin qada Newrozê.&nbsp;

	&nbsp;

	‘EM BI RUHÊ 2008’AN BIHERIKIN QADA NEWROZÊ’&nbsp;

	&nbsp;

	Fadil Bariştran ê di Newroza 2008’an de endamê Komîteya Amadekar a Newrozê bû jî banga beşdariya Newrozê li xelkê Wanê kir û got: “Pêwîste xelkê me yê Wanê bi ruhê Newroza sala 2008’an biherike qada Newrozê ya li ber Keleha Wanê. Lazim e li qada Newrozê li dijî polîtîkaya tecrîdê ya li ser Rêberê PKK’ê Abdullah Ocalan deng were derxistin.”&nbsp;

	&nbsp;

	&nbsp;