DÎSKÎ’yê cardin heqê avê biha kir 

2020-08-27 09:04:43


	AMED - Midûriyeta Giştî ya DÎSKÎ’yê careke din heqê avê biha kir. DÎSKÎ'yê par ji sedî 330 heqê avê biha kiribû û niha jî di navbera ji sedî 24-112 heqê avê biha kiriye. 

	 

	Miduriyeta Giştî ya Karê Qenalîzasyon û Avê (DÎSKÎ) careke din heqê avê biha kir. DÎSKÎ'yê di 1'ê Çileyê de li Amedê di navbera ji sedî 35 û 330'yî de av zem kiribû. Lê belê DÎSKÎ'yê wekî cara ewil vê carê jî heqê avê bi bêdengî biha kiriye.Miduriyeta Giştî ya DÎSKÎ’yê li navend û navçeyên Amedê di navbera ji sedî 24,82 û ji sedî 112,40 de heqê avê biha kiriye. 

	 

	Şaredariya Bajarê Mezin a Amedê ku ji aliyê qeyûm ve tê birêvebirin, li navenda Amedê bihayê metrekupa avê ji 2,82 TL kir 3,52 TL û ji sedî 24,82; li navçeya Çinarê ji 1,09 TL kir 1,76 TL û ji sedî 61,47; li Çunguş, Pîran, Hezro, Karaz, Pasûr û Licê ji 1,28 TL kir 1,76 TL û ji sedî 37,50 heqê avê biha kiriye. 

	 

	Li Farqînê jî bihayê metrekupa avê ji 1,28 TL'yî kiriye 2,26 û ji sedî 76,56; li Erxenî û Bismilê jî ji 1,89 TL'yî kiriye 2,26 TL û ji sedî 19,58 lheqê avê biha kiriye. 

	 

	Her wiha DÎSKÎ'yê heqê ava li sazî û dezgehên bazirganiyê û sazî û dezgehên komî jî heya ji sedî 111,84'an biha kiriye.