
16 sal cezayê girtîgehê li Hevşaredara Nisêbînê Kaya birîn

2020-06-22 15:14:14


	&nbsp;

	MÊRDÎN – Di doza ku Hevşaredara Nisêbînê ya HDP’î ya girtî Sara Kaya dihat darizandin de dadgehê 16 sal cezayê girtîgehê li Kaya birî.&nbsp;

	&nbsp;

	Daneşîna doza Hevşaredara berê ya Nisêbînê Sara Kaya ku di 13’ê Çileya 2017’an de bi serdegirtina mala xwe ya li navçeya Nisêbînê ya Mêrdînê de hatibû binçavkirin û piştre hatibû girtin, hat dîtin. Daneşîn, li 4’emîn Dadgeha Cezaya Giran a Mêrdînê hat dîtin. Kaya ku bi sûcdariyên mîna “Xerakirina yekitî û yekparebûna dewletê” û “Endamtiya rêxistinê” tê darizandin ji Girtîgeha Tîpa T a Tarsûsê bi rêya SEGBÎS’ê tevlî daneşînê bû. Parêzerên Kaya jî li daneşînê amade bûn.&nbsp;

	&nbsp;

	PARASTIN HATIN KIRIN

	&nbsp;

	Piştî tespîtkirina nasameyê daneşînê dest pê kir. Dozger mutalaaya xwe ya berê dubare kir û daxwaz kir ku cezayê muebbetê li Kaya bê birîn. Kaya, li dijî mutalaayê parastina xwe kir û sûcdariyên li red kir daxwaza beraata xwe kir. Piştre parêzerên Kaya jî parastina Kaya kirin û destnîşan kirin ku ji bo sûcdariyên ku li muwekîla wan tên kirin piştre delîl hatine çêkirin û daxwaz kirin ku derbarê Kaya de biryara beraatê bê dayîn.&nbsp;

	&nbsp;

	CEZA LI KAYA BIRÎN

	&nbsp;

	Piştî navbereke kurt heyeta dadgehê biryara xwe aşkera kir. Dadgehê, biryar da ku wesfên sûcdariya “Xerakirina yekitî û yekparebûna dewletê” çênebûne û bi angaşta “Endamtiya rêxistinê” 9 sal cezayê girtîgehê li Kaya birî. Dadgehê piştre cezayê Kaya zêde kir û derxist 13 sal û 6 mehan. Dadgehê, bi angaşta “peywira xwe baş bikar naniye” 6 meh û bi angaşta “Gel tehrîqê neyartî û kînê” kiriye jî 2 sal cezayê girtîgehê li Kaya birî.&nbsp;

	&nbsp;

	Dadgehê, her wiha biryar da ku girtina Kaya bê berdewamkirin.&nbsp;

	&nbsp;

	&nbsp;

	&nbsp;

	&nbsp;